जानकी गाउँपालिकासे भीडभाड नाइ कैना आग्रह
पहुरा समाचारदाता
धनगढी, १ भदौ । कैलालीके जानकी गाउँपालिकासे भिडभाड नाइ कैना आग्रह करले बा ।
कोभिड १९ के रोकथाम तथा नियन्त्रण ओ स्वास्थ्य सुरक्षाहे मध्यनजर करटी गाउँपालिकासे कौनो फेन तालिम, गोष्ठी, सेमिनार, बैठक, जन्मदिन, सांस्कृतिक कार्यक्रम, सामूहिक भोज, पार्टी, तीजके कार्यक्रम तथा सामूहिक रुपमे भेला हुइना जैसिन अन्य कार्यक्रम नाइ कैना आग्रह करल हो ।
सोम्मारके रोज एक सूचना जारी करटी गाउँपालिकासे औरे सूचना नाइ आइटसम उ सक्कु कार्यक्रम कैनामे रोक लगाइल गाउँपालिकाके अध्यक्ष प्रदीपकुमार चौधरी जानकारी डेलै । कोइ फेन उ सूचनाके अवहेलना कैके अवज्ञा करल पाइलमे संक्रमण रोग ऐन तथा नेपाल सरकारके प्रचलित नियमानुसार कारवाही फेन कैना अध्यक्ष चौधरी जानकारी डेलै ।
ओस्टके लम्कीचूहा नगर क्षेत्र भिट्टर फेन सामूहिक रुपमे तीज नाइ मनाइ पैना हो । कोभिड १९ के कारण विश्व नै आक्रान्त बनल अवस्थामे स्वास्थ्य संबेदनशिलताहे मध्यनजर करटी सार्बजनिक रुपमे भेला होके लम्कीचुहा नगर क्षेत्र भिट्टर यी बरसके तीज मनाइ नाइ पैना कहटी नगरपालिकासे सम्बन्धित सक्कु पक्षहे कडाईके साथ कार्यन्वयनके लाग निर्देशन करल बा ।
नगर प्रमुख महादेव बजगाईके अध्यक्षतामे सोम्मारके बैठल सर्बदलिय बैंठकसे नेपालीहुक्रनके महत्वपुर्ण टिहार तीजहे मध्यनजर करटी तीजहे सार्वजनिक रुपमे भेला होके नाइ मनैना निर्णय करल हो ।
सार्बजनिकरुपमे तीज कार्यक्रम करेबर तथा नाचगान करेबर समाजिक दुरी कायम नाइ हुइना हुइल ओरसे महामारीसे बचक लाग ओइसीन निर्णय हुइल नगर प्रमुखके सचिवालय प्रमुख धनन्जय न्यौपाने जानकारी डेलै ।
