भजनीके बाढपीडितहे सुदूरपश्चिमेली नेपाली समाज अमेरिकाके सहयोग

पहुरा समाचारदाता
टीकापुर, १ भदौ । कैलालीके भजनी नगरपालिका वडा नम्बर ८ के टमान समुदायके बाढ पीडितहुक्रनहे राहत बितरण करल बा ।

सावन १४ गते आइल बाढसे मृतकके परिवार सहित अन्य बाढ पीडितहे राहत स्वरुप नगद रकम वितरण करल हो । भजनी नगरपालिका वडा नम्बर ८ के वडाध्यक्ष पंकज चौधरी सुदूपश्चिमेली नेपाली समाज क्यालिफोर्निया युएसएसे करल सहयोग रकम मृतकके परिवार सहित अन्य बाढ पीडितहे एक कार्यक्रमके बिच हस्तान्तरण करल रहिट ।

बाढमे ज्यान गुमाइल एजिकेल चौधरी, चक्रबहादुर बिक, ईश्वर शाहीके परिवारहे ५/५ हजारके दरसे ओ अन्य १३ घरपरिवारहे जनही २/२ हजारके दरसे राहत बितरण करल वडाध्यक्ष पंकज चौधरी जानकारी डेलै ।

बाढसे पुर्णरुपमे घरमे क्षति हुइल स्यानु चौधरी, बाले ढोली, दिलिप साउँद, तेजबहादुर साउँद, लक्ष्मण चौधरी, भुखाली चौधरी, पतिराम चौधरी, सतनारायण चौधरी, खगेन्द्र शाही, पार्वती शाही, जयाबहादुर कामी, सहवीर बिक ओ पुरन डंगौराहे समेत जनही २ हजारके दरसे नगद सहयोग करल वडा सदस्य कृष्ण धमाला जानकारी डेलै ।

पत्रकार मानबहादुरके समन्वयमे सुदूपश्चिमेली नेपाली समाज क्यालिफोर्निया युएसएके अध्यक्ष करन चन्द, उपाध्यक्ष हेमबहादुर ठकुल्ला, उपाध्यक्ष खेमु रेग्मी, महासचिव मनिराज न्यौपाने ओ वरिष्ठ सल्लाहाकार गणेश भट्टराई लगायतके टोली सहयोग करल हो ।