गाउँघरमे कोरोना बिरूद्धके कहटी होमोप्याथिक औषधि वितरण, प्रशासनसे रोक
पहुरा समाचारदाता
धनगढी, २ भदौ । कैलाली जिल्लाके ग्रामीण भेगमे कोरोना विरुद्धके कहटी होमोप्याथिक औषधि वितरण करल पागिल बा ।
जिल्लाके कैलारी गाउँपालिका, धनगढी उपमहानगरपालिका, लम्की चुहानगरपालिका, भजनी नगरपालिकाके ग्रामीण क्षेत्रमे कोरोना भाइरस रोगसे जुझे सक्ना रोग प्रतिरोधात्मक क्षमता बह्रैना होमोप्याथिक औषधि कहटी वितरण करल पागिल हो ।
औषधिमे उल्लेख हुइल विवरण अनुसार मारवाडी सेवा संघ नेपाल नामक संस्था औषधि वितरण कर्ले बा । कैलारी गाउँपालिका वडा नम्बर ८ के वडा सचिव तुलसी चौधरी वडा कार्यालयमे उ औषधि वितरणबारे जानकारी नैआइल बटैलै । मने उ वडास्थित गाउँघरमे मारवाडी सेवा संघ नेपाल कना संस्थासे वितरण करल खबर अप्नेहुक्रे पाइल वडा सचिव चौधरी स्पष्ट पर्लै ।
सेती प्रादेशिक अस्पतालके फिजिसियन डाक्टर जगदिश जोशी हालसम कोरोना विरुद्धके औषधि पत्ता नैलागल अवस्थामे अनाधिकृत रुपमे वितरण हुइना कौनो फेन औषधि सेवन नैकरेक पर्ना तथा नैकरैना सल्लाह डेलै । रोग प्रतिरोधी कहटी आयुर्वेदिक औषधि खावाइल कना अइलेसे फेन सरकारसे अधिकारिकता प्रमाणित हुइलेसे किल सेवन करेक पर्र्ना डाक्टर जोशीके कहाइ बा ।
यहेबीच जिल्ला प्रहरी कार्यालय कैलालीके प्रमुख तथा प्रहरी उपरिक्षक अनुपम शमशेर राणा वितरण करटी रहल सूचना पैटी किल औषधि वितरणमे रोक लगाइल जानकारी डेलै । वितरकहुक्रे अनाधिकृत रुपमे उ औषधि वितरण करलओरसे मंगरके रोजसे वितरणमे रोक लगाइल बटैलै ।
मने अनाधिकृत रुपमे ग्रामीण भेगमे औषधि वितरण करुइयाहुकन नियन्त्रणमे भर प्रहरी लेहे नैसेक्ले हो ।
