२० प्रतिशत मुक्तहलिया अभिन पुनःस्थापनासे बन्चित
पहुरा समाचारदाता
धनगढी, २१ भदौ । नेपालमे दासत्वके रुपमे रहल हलियाप्रथा अन्त्य हुइल १२ औं बरस हुइलेसेफे कुल तथ्याङकके अभिनसम २० प्रतिशत मुक्तहलिया पुनस्र्थापनासे बन्चित रहल बाटै ।
१२ औं हलिया मुक्ति दिवस २०७७ के सन्दर्भमे मुक्तहलियाके क्षेत्रमे काम करुइया संघ,संस्थासे शनिच्चरके रोज निकारल संयूक्त प्रेस विज्ञप्तीमे नेपाल सरकारसे प्रमाणिकरण हुइल १६ हजार ९ सय ५३ घरधुरी मध्ये १३ हजार ५ सय ४६ घरधुरी केल पुनस्र्थापनाके प्याकेज प्राप्त करले जनैले बटै । पुनस्र्थापना प्याकेज पाइल मन्से ९ प्रतिशत घरधुरी दुसरा किस्ता रकम भेटाई नइसेकल राष्ट्रिय मुक्तहलिया समाज महासंघ नेपालके ईश्वर सुनार जनैले बाटै । मुक्तहलियाके कुल तथ्याङक मन्से अभिन २० प्रतिशत मुक्तहलिया पुनस्र्थापना हुई नइसेकल कारण शिक्षा, स्वास्थ्य, रोजगारीसे बन्चित हुइल उहाँक कहाई बा । जिविकोपार्जन, सामाजिक सशक्तिकरण ओ समावेशीकरण सम्बन्धी मुद्दाहे सरकारसे विशेष प्राथमिकताके साथ प्रभावकारी रुपमे कार्यान्वयन करे नइसेक्के बाँधाश्रमसे अन्त्य हुइल १२ बर्ष विटलेसेफे हलियाहुक्रे रोग, भोक ओ शोकयुक्त निरासाजनक जीवन व्यतित कैना बाध्य हुइल केन्द्रीय अध्यक्ष सुनार बटैलै ।
पुनस्र्थापनाके समयावधि लम्बैटी जाईबेर पुनस्र्थापनाके पर्खाइमे रहल मुक्तहलियाहुक्रे बसोबासके उचित व्यवस्थापन हुई नइसेकल पुनःस्थापना समितिके पूर्वसंयोजक तथा संविधान सभा सदस्य हरि श्रीपाइली जनैलै ।
नेपाल सरकार ओ हलिया महासंघ बिच हुइल ५ बँुदें सम्झौताके भावना ओ मर्म अनुरुप हलिया पुनस्र्थापनाके कार्यमे अपेक्षाकृत रुपमे प्रगती हुई नइसेक्के १२ औं हलिया मुक्ति दिवसहे उत्साह ओ उमङके साथ मनाई नइपाइल राष्ट्रिय दलित नेटवर्क, नेपाल तथा बाध्यकारी श्रम अन्त्यका लागि पैरवी समूहके केन्द्रीय अध्यक्ष गणेश बिके कहठै । १२ औं हलिया मुक्ति दिवसहे प्राप्त उपलब्धीके रक्षा करटी ठप अधिकारके लाग संघर्षके मान्यता अनुरुप मनाइल उहाँक कहाई बा ।
विश्वब्यापी महामारीके रुपमे फैलल कोभिड–१९ से मुक्तहलियाहुक्रे सबसे ढेर प्रभावित हुइल नेपाल राष्ट्रिय दलित समाज कल्याण संघके राष्ट्रिय अध्यक्ष त्रिलोकचन्द विश्वास विक जनैलै । देशमे हुइल बन्दाबन्दी ओ रोजगारीके शिलसिलामे आन्तरिक तथा वाह्य रोजगारीसे हलिया परिवारके सदस्य घर लौटेबेर एकओर बेरोजगार हुइल दुसर ओर भोकमरी, तथा चरमगरिबीके चक्रब्युहमे परल उहाँक कहाई बा ।
कमैयाप्रथा उन्मुलन समाज कैलालीके अध्यक्ष बसन्ती चौधरी, मुक्तकमैया महिला विकास मञ्च कैलालीके अध्यक्ष कौशिला चौधरीफे मुक्तहलियाके बाँकी पुनस्र्थापनाके अभियानमे सहयोग तथा ऐक्यबद्धताके रहल जनैले बाटै ।
