सुदूरपश्चिममे २३ संक्रमित ठप्लै
पहुरा समाचारचारदाता
धनगढी,२४ भदौ । सुदूरपश्चिम प्रदेशमे बुधके रोज २३ जाने कोरोना भाइरसके संक्रमित ठपल बाटै ।
सेती प्रादेशिक अस्पतालके प्रयोगशालामे १९ ओ डडेल्धुरा अस्पतालके प्रयोगशालामे ४ करके २३ जाने कोरोना संक्रमित ठपल हुइट । सेती प्रादेशिक अस्पताल प्रयोगशालाके सूचना अधिकारी दिलिपकुमार श्रेष्ठके अनुसार लौवा ठपल १८ जाने कैलालीके ओ एक जाने बाजुराके रहल बाटै ।
सेती प्रादेशिक अस्पतालमे पछिल्का २४ घण्टामे ५ सय ७ जनहनमे करल परिक्षणमे बाजुरा बडिमालिका–८ के एक पुरुष, कैलाली धनगढी–१ के दुई पुरुष, धनगढी–२,३ के एक÷एक पुरुष, धनगढी–५ के तीन महिला, दुई पुरुष, धनगढी–१३ के एक पुरुष, धनगढी, कैलालीके चार पुरुष ओ गोदावरी कैलालीके दुई महिला दुई पुुरुष करके १९ जाने रहल बाटै ।
ओस्टेक डडेल्धुरा अस्पताल कोभिड–१९ परिक्षण प्रयोगशालाके इन्चार्ज ईश्वरी प्रसाद भुषालके अनुसार ठप ४ जनहनमे कोरोना संक्रमण पुष्टि हुइल बा । पछिल्का २४ घण्टामे १ सय २७ जनहनमे करल परिक्षणमे ४ जनहनमे कोरोना संक्रमण पुष्टि हुइल हो । लौवा ठपल संक्रमित बझाङ दुर्गाथली, छब्बिसपाथिभाराके एक/एक जाने ओ दार्चुला व्यास, महाकालीकेफे एक÷एक जाने करके ४ जनहनमे संक्रमण पुष्टि हुइल ।
ओस्टेक पछिल्का २४ घण्टामे देशभर थप १ हजार ८१ जनहनमे संक्रमण पुष्टि हुइल बा । बुधके नियमित प्रेस ब्रिफिङमे स्वास्थ्य मन्त्रालयके प्रवक्ता डा जागेश्वर गौतम उ जानकारी डेहल हुइट । उहाँ हालसम संक्रमितके कुल संख्या ४९,२१९ पुगल फे जानकारी डेलै ।
विटल २४ घण्टामे ९१८ जाने संक्रमण मुक्त हुइल बाटै कलेसे हालसम ठिक हुइलके कुल संख्या ३३ हजार ८८२ पुगल बा ।
बुधसम देशभर सक्रिय संक्रमितके संख्या १५ हजार २५ रहल बा । जेम्ने संस्थागत आइसोलेशनमे ७ हजार ९८८ जाने रहल बाटै । कलेसे होम आइसोलेशनमे ७ हजार ३७ जाने रहल बाटै । पछिल्का २४ घण्टामे ११ हजार १६७ जानेक पीसीआर परीक्षण हुइल बा ।
कोरोनासे थप ६ जानेक मृत्यु
नेपालमे कोरोना संक्रमण (कोभिड—१९) से थप ६ जानेक मृत्यु हुइल बा । स्वास्थ्य मन्त्रालयके अनुसार पछिल्का २४ घण्टामे ३ महिला ओ ३ जाने पुरुषके कोरोनासे मृत्यु हुइल हो । काठमाडौंमे ८३ वर्षीया महिला ओ ६७ वर्षीय पुरुषके कोरोनासे मृत्यु हुइल मन्त्रालयके डा जागेश्वर गौतम बटैैलै ।
ओस्टेक कास्कीमे ७३ वर्षीया महिला, अर्घाखाँँचीमे ४२ वर्षीय पुरुष, बाँकेमे ८० वर्षीया महिला ओ नवलपरासीमे ६४ वर्षीय पुरुषके मृत्यु हुइल हो । यी संगे नेपालमे कोरोनासे मृत्यु हुइलके संख्या ३ सय १२ पुगल बा ।
