थारु समुदायमे घर–घर जितिया पर्व मनैटी

पहुरा समाचारदाता
उदयपुर, २६ भदौ । कोरोना भाइरसके कहर विच विफेक रोज थारु समुदायमे जितिया पर्व घर–घर मनैटी बटै ।

थारु समुदायमे छावा छाईक सुःख, समृद्धि, शान्ति तथा दीर्घजीवनके कामना करटी मनैना पर्व यी बरस कोरोनाके कारणसे छाईनहे नइबोलाके वा भोज भटेर नइकरके घर–घर जितिया पर्व मनैटी बटै ।

थारु समुदायके महत्वपूर्ण चाड पर्व मध्येके जितिया एक हो । जितिया पूर्व पूर्व मेचीके झापासे पश्चिमके कपिलवस्तुसमके थारु समुदाय यी पर्व मनैठै । विफेक रोज उदयपुर, सिरहा, सप्तरी, सुनसरी, मोरङ, धनुषा, महोत्तरी चितवन लगायतके जिल्लामे जितिया पर्व मनाजाइटा ।

विशेष करके लैहर घर छोरके ससरार घर गैल लौव भोजही ओ भोज हुइल महिलाहे लैहर घर बोलाके लम्मा समयके भेटघाट, दुःख, सुःखके भलाकुसारी कैना दिनके रुपमेफे थारु समुदायमे यी पर्वहे लेहल थारु कल्याणकारिणी सभा उदयपुरके अध्यक्ष शिवकान्त चौधरी बटैलै ।

यी पर्वमे डाडुभैया डिडी बहिनीयाहुकनहे लैहर बोलाके मिठा मिठा खैनाचिज खवाई ससरार पठैना ओ डिडी बहिनीयाहे एक जोर कपरा फेर डेनाफे चलन रहल अध्यक्ष शिवकान्त बटैलै । कोरोना कहरसे यी वर्ष कहु कटै नाँच गान, भोज भटेर, सभा सम्मेलन नइकैना आग्रह करल उहाँ बटैलै । घर घरेम सामाजिक दुरी कायम करके जितिया पर्व मनैना अनुरोध करल उहाँ बटैलै ।