कुलमानके पुनः नियुक्तिके लाग धनगढीमे प्रदर्शन

पहुरा समाचारदाता
धनगढी, ३१ भदौ । कुलमान घिसिङहे नेपाल विद्युत प्राधिकरणके कार्यकारी निर्देशकमे फेनसे नियुक्त कैना ओ डा. गोविन्द केसीके माग सम्बोधन करे पर्ना कहटी धनगढीमे प्रदर्शन हुइल बा ।

बुधके युवाहुक्रे धनगढीके पार्कमोडमे प्लेकार्ड सहित प्रदर्शन करल हुइट । कुलमानहे फेरसे प्राधिकरणके जिम्मेवारी डेहे पर्ना ओ डा. केसीसे उठाइल माग तुरुन्त सम्बोधन हुइ पर्ना कहटी दबावस्वरुप प्रदर्शन करल सुरेन्द्र शाह बटैलै ।

घिसिङके चार बरसके कार्यकाल अँटवारके रोज पुरा हुइल रहे । प्राधिकरणके कर्मचारी मंगरके रोज ओहकान औपचारिक बिदाइ फेन करल रहिट ।

ओस्टके चिकित्सा शिक्षा सुधारके टमान माग रख्टी आइल डा. गोविन्द केसी जुम्लाके चन्दननाथ –६ रानीचौरमे रहल बाबिरा मन्दिरमे आपन १९औँ सत्याग्रह सुरु करले बाटै ।