थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १६ चैत २६४७, शुक्कर ]
[ वि.सं १६ चैत्र २०८०, शुक्रबार ]
[ 29 Mar 2024, Friday ]

जोशीपुरमे मलवारा पोलिक्लिनिक समुद्घाटन

पहुरा | ३ आश्विन २०७७, शनिबार
जोशीपुरमे मलवारा पोलिक्लिनिक समुद्घाटन

सुधराम दहित
जोशीपुर, ३ कुवाँर ।
कैलालीके जोशीपुरमे मलवारा पोलिक्लिनिक प्रालिके समुद्घाटन हुइल बा ।

पोलिक्लिनिकहे जोशीपुर गाउँपालिका अध्यक्ष तथा कार्यक्रमके बरका पहुना रामकृष्ण चौधरी उद्घाटन करल रहिट । जोशीपुर जेसीज वर्ष २०२० के अध्यक्ष जेसी विष्णुप्रसाद डंगौराके अध्यक्षतामे हुइल समुद्घाटन समारोहहे सम्बोधन करटी बरका पहुना चौधरी स्वास्थ्य क्षेत्र अन्तर्गत यी ग्रामीण क्षेत्रके जनतासे भोगल समस्या बारे प्रस्ट्यइटी यी ठाउँमे वरिष्ठ विशेषज्ञ एमविविएस डाक्टर सहितके पोलिक्लिनिक स्थापना हुइना जोशीपुरके गौरवके विषय रहल बटैलै ।

बिरामीहुकनहे ईमर्जेन्सीमे धनगढी, कोहल्पुर, नेपालगंज लैजाई पर्ना अवस्था यहाँके जनताहुक्रे भोग्टी अइटी रहल ओ आब उपरान्त यी क्षेत्रके विरामीहुक्रे यी पोलिक्लिनीकमे मजा सेवा सुविधा सहित सेवा पैना आशा ओ अपेक्षा रहलफे अध्यक्ष रामकृष्ण बटैलै ।

यी पोलिक्लिनिकमे विरामीहुकनसंग मजा व्यवहार करजाए ओ समृद्धिके लाग यहाँके वुद्धिजीवी, समाजसेवी, शिक्षाप्रेमी, जनप्रतिनिधिसंग कोर्डिनेशन ओ समन्वय आवश्यक रहलफे बरका पहुना चौधरी बटैलै । वाहेरसे आइल डाक्टरहुकनहे यी ठाउँके भाषामे विशेष ध्यान डेना ओ विरामीहुकनसंग यहाँक स्थानीय भाषा प्रयोग करके परामर्श डेजाए कना सुझाव उहाँ डेहल रहिट ।

गाउँपालिका उपाध्यक्ष तथा विशिष्ट पहुना गीता कठरिया महिलाके समस्याहे महिला डक्टर चेकजाँच तथा उपचार करे पर्ना उहाँ कहाई रहे । पुरुष डक्टरसे महिलाहे चेकजाँच करेबेर महिलाहुक्रे अपन समस्याहे खुलके कहे नइसेक्के लुकैना प्रवृति अभिनफे रहल उहाँ बटैली । यिहीसे महिलाके समस्या भर ओस्टे बा मने आब यी पोलिक्लिनीकमे महिला डक्टरहुक्रे महिला बिरामीहुकनहे चेकजाँच कैना वातावरण सहज बनाई डेहलपाछे महिला डिडी बहिनियाहुकनहे अपन समस्या डेखैना सहज हुइनाफे उहाँ बटैली ।

ओस्टेक वडा नम्बर १ के वडाध्यक्ष विधिराम चौधरी स्थानीय सरकारबसे हुइ सेक्ना सहयोग कैना कहटी पोलिक्लिनिकहे हौसला प्रदान करल रहिट । जोशीपुर जेसीजके संस्थापक अध्यक्ष सन्तोष पौडेल, बजार व्यवस्थापन समिति अध्यक्ष विश्वनाथ प्रसाद चौधरी लगायत शुभकामना व्यक्त करल रहिट ।

कार्यक्रममे लक्ष्मी चौधरी स्वागत मन्तव्य व्यक्त करल रहिट कलेसे जोशीपुर जेसीजके कार्यकारी उपाध्यक्ष धर्मेन्द्र विष्ट शहजीकरण करल रहिट ।

२४ सै घण्टा ईमरजेन्सी सेवा, फार्मेसी सेवा, प्याथोलोजी सेवा, भिडियो एक्सरे (यूएसजी) सुविधा, डिजिटल एक्सरे, जनरल फिजिसियन सम्बन्धी सेवा, हाडजोर्नी तथा नशारोग सम्बन्धी सेवा, रेडियोलोजी विशेषज्ञ सेवा, बालरोग विशेषज्ञ सेवा, नाक, मुख, घाँटी रोग विशेषज्ञ लगायत परापर्श सहितके सेवा, मुटुके ईसिजी तथा पिएफटी सेवा, प्रसूति तथा माईनर अपरेशनके सेवा समेत रहल बा ।

पोलिक्लिनिकके डक्टरहुकनहे जोशीपुर जेसीज वर्ष २०२० के अध्यक्ष विष्णुप्रसाद डंगौरा डक्टरहुकनके हौसला प्रदान कैना मायाके चिनो समेत डेहल रहिट ।

मलवारा पोलिक्लिनिकमे एमविविएस मेडिकल अफिसर डा. सविना कटवाल, आईसियु इन्चार्ज डा. वीरेन्द्र डंगौरा, एमडि ईन्टरनल मेडिसिन डा. प्रवेश पन्त, एमविविएस एमएस अर्थो डा. श्रीराम खाती ओ नवजात शिशु तथा बाल विशेषज्ञ डा. दीपक पौडेल रहल बाटै ।

जनाअवजको टिप्पणीहरू