हत्या हुइल कहटी कारावाहीके माग कैटी प्रदर्शन
पहुरा समाचारदाता
धनगढी, ४ कुवाँर । शुुकके रोज बन्वामे गरझुलल् अवस्थामे मृत भेटल पत्रकार निर्मला पहराइके हत्या हुइल कहटी धनगढीमे प्रर्दशन करल बा ।
कैलालीके घोडाघोडी नगरपालिकाके सुखडमे रहल कैलाली एफएममे कार्यरत २३ वर्षीया पहराइके हत्या हुइल कहटी दोषीहे कारवाहीके माग करटी जिल्ला प्रशासन कार्यालयके मूल गेटमे धर्ना डेटी प्रर्दशन करल हो ।
पहराइ मृत भेटल घटनाके सत्यतथ्य छानविन कैके हत्यामे संलग्न व्यक्तिहे कारवाहीके माग करटी दलित संघ संगठन धनगढीमे प्रदर्शन करल हो । पहराईहे ओहकान सहकर्मी भोजके प्रलोभनमे पारके हत्या करल आरोप उहाँहुक्रे लगैले बाटै ।
घोडाघोडी नगरपालिका वडा नम्वर ५ मे रहल फूलवारी सामुदायिक बन्वामे गरझुलल् अवस्थामे पहराइ मृत भेटल घटनामे अनुसन्धानके लाग ओहकान पूर्व सहकर्मी समेत रहल पत्रकार ललित जाग्रीहे सोधपुछके लाग नियन्त्रणमे लेहल प्रहरी जनैले बा ।
ईलाका प्रहरी कार्यालय सुखडके प्रमुख प्रहरी नायब उपरिक्षक सागर बोहोरा सोधपुछके लाग जाग्रीहे नियन्त्रणमे राखल रलेसे फेन पीडित पक्षसे जाहेरी नाइ आइल बटैलै ।
ओहकान पीडित पक्षसे डेना जाहेरीके आधारमे घटनाबारे थप अनुसन्धान कैना बटैलै । शव परीक्षणके रिर्पोट समेत नाइ आइल ओरसे अब्बे नै हत्या वा आत्महत्या का हो ? कहिके कहे नाइ सेक्ना उहाँ बटैलै । परिवार भर पहराइके हत्या करल कहटी दोषीहे कारवाही कैना माग करटी आइल बाटै ।
घोडाघोडी नगरपालिका वडा नम्वर ४ स्थायी बसोबास रहल पहाराई भदौ ३१ गतेसे वेपत्ता रही कलेसे शुकके उहाँ गरझुलल् अवस्थामे उहाँ मृत भेटल रही । मृतक पहराईके शव सेती प्रादेशिक अस्पतालमे राखल बा ।
