व्यवसाय संचालन ढाँचा सम्बन्धी निर्देशिकाबारे छलफल

पहुरा समाचारदाता
धनगढी,६ कुवाँर । दिगो उत्पादन ओ रोजगारी प्रवर्द्धनके लाग तरकारी तथा कुखुरा पालन व्यवसायके मुल्य श्रृखला सम्बन्धी तालिम ओ व्यवसाय संचालन ढाँचा सम्बन्धी निर्देशिकाबारे मंगरके रोज धनगढीमे सरोकारवाला निकायविच छलफल हुइल बा ।

निड्स नेपालके आयोजनामे हुइल कार्यक्रममे संस्थाके कार्यकारी निर्देशक भवराज रेग्मी ‘बजारमा आधारित प्राविधिक तथा व्यवसायिक सीप प्रवद्र्धन परियोजना’ के लक्ष्य उदेश्य ओ समावेश कैना क्षेत्रके बारे जानकारी डेहल रहिट । युरोपियन युनियन ओ ब्रिटिस काउन्सिलके सहयोगमे निड्स नेपालसे सुदूरपश्चिम प्रदेशके कञ्चनपुर, कैलाली ओ बझाङ जिल्लामे दक्षता परियोजना लागु करल कार्यकारी निर्देशक रेग्मी जनैलै । १ मार्च २०२० से सुरु करल परियोजनाके अवधि ३१ अगष्ट २०२१ सम करके १८ महिना रहल बा । उ परियोजनाके लाग २ करोड ५४ लाख ३ हजार ८ सय २० रुप्या बजेट रहल उहाँ जनैलै ।

दिगो उत्पादन ओ रोजगारी प्रवद्र्धनके लाग तरकारी तथा कुखुरा पालन व्यवसायके मुल्य श्रृखला सम्बन्धी तालिम ओ व्यवसाय संचालन ढाँचा सम्बन्धी निर्देशिकाबारे टिकाराम थापा जानकारी डेहल रहिट । दिगो उत्पादन ओ रोजगारी प्रवद्र्धनके लाग प्राङगारिक तरकारी उत्पादन ओ कुखुरा पालन तालिका संचालन ढाँचा, प्राविधिक तालिम संचालन निर्देशिका कार्यपत्र प्रस्तुत करले रहिट ।

निर्देशिकामे सरोकारवाला निकायके ओरसे धनगढी विनायक भेटके संचालक विष्णु बुर्लाकोटी, पेटभेट सेन्टरके संचालक भुपेन्द्र थापा, धनगढी उपममहानगरपालिकाके कृषि विकास अधिकृत लोकराज उपाध्याय, गौरीगंगा नगरपालिकाके कृषि विकास अधिकृत दिपेन्द्र परियार, सुनाखरी बहुउद्देश्यीय कृषि फर्म धनगढी–५ के संचालक रामकिसुन चौधरी लगायत व्यवसाय संचालन ढाँचा सम्बन्धी निर्देशिकामे व्यवसायिक तरकारी खेती ओ कुखुरा पालन तालिम सुझाव रहिट ।

कार्यक्रम निड्स नेपालके अध्यक्ष अन्जु जोशी भट्टके अध्यक्षतामे हुइल रहे । कार्यक्रममे उहाँ परियोजनासे विदेशमे रोजगार गुमाके स्वदेश लौटल ओ स्थानीय बेरोजगार युवाहे बजार मागमे आधारित कृषिमे स्वरोजगार कार्यक्रम संचालन करटी रहल जनैली । अर्धसीप ओ सीप नइरहल युवाहुकनके रोजगार तथा स्वरोजगार प्राप्तीके लाग बजारके आवश्यकता अनुसार ज्ञान तथा सीपमे वृद्धि कैना निर्दिष्ट उद्देश्य रहल परियोजनासे कृषि, निर्माण ओ पर्यटन क्षेत्रहे समेट्ना अध्यक्ष भट्ट बटैली ।

कार्यक्रमके सहजीकरण संस्थाके कार्यक्रम संयोजक विनोद कडारा करले रहिट । उहाँ साँझेदार संस्थासंगे प्राविधिक रुपमे गुरुकुल इन्स्टिच्युट अफ टेक्नोलोजी प्रालि कञ्चनपुर ओ डिभोटी तालिम तथा अनुसन्धान केन्द्र कैलालीके सहयोग रहल जनैलै ।