समूहहे कृषि भण्डार केन्द्र भवन हस्तान्तरण

पहुरा समाचारदाता
हसुलिया, ६ कुवाँर । कैलालीके कैलारी गाउँपालिका–७ मे रहल कृषि समूहहे मंगरके रोज कृषि भवन हस्तान्तरण करल बा ।

वडा नम्बर ७ के वडा कार्यालयसे बड्का बसन्तामे रहल कृषि भण्डार केन्द्र भवन हरियाली नमूना गाउँ (गोहुँ) कृषक समूहहे हस्तान्तरण करल हो ।

कैलारी गाउँपालिकाके प्रवक्ता समेत रहल वडा अध्यक्ष कमलप्रसाद चौधरी समूहके अध्यक्ष पार्वती चौधरीहे भण्डार केन्द्र हस्तान्तरण करलै । ८४ लाख रुपैयाँँ खर्च करके कृषि भण्डार केन्द्रके भवनके निर्माण करल हो ।

केन्द्र भवन निर्माणके लाग आर्थिक वर्ष २०७५/०७६ मे तराई मधेस समृद्धि कार्यक्रम अन्तर्गत बजेट विनियोजन हुइल रहे । कृषि भण्डार केन्द्रमे बीउ, कृषिमे प्रयोग हुइना टमान उपकरण भण्डारण करे सेक्ना वडा अध्यक्ष चौधरी बटैलै ।