कल्गीके १२ औं स्थापना दिवस
पहुरा समाचारदाता
धनगढी, ९ कुवाँर । धनगढी उपमहानगरपालिका वडा नम्बर १४, फुलवारीस्थित रहल कल्गी बचत तथा ऋण सहकारी संस्थाके १२ औं स्थापना दिवस मनागिल बा ।
सहकारीके अध्यक्ष रामचन्द्र चौधरीके अध्यक्षतामे हुइल कार्यक्रमके बर्का पहुना प्रदेश सभा सदस्य सुशीला बुढाथोकी रहल रही । कार्यक्रममे बर्का पहुना बुढाथोकी प्रदेश अन्तर्गत रहल टमान बचत तथा ऋण सहकारी संस्था टमान सेवा सुविधासे वञ्चित रहल बटैली । मने सहकारी सञ्चालन ऐन कार्यान्वय तथा परिमार्जन कैके सहकारीहे उ सेवा प्रदान कैना जानकारी डेली ।
ओस्टके उहाँ बचत तथा ऋण सहकारी संस्थाहे गाउँघरके किसान लगायत व्यापार व्यवसाय करुइया इच्छुक व्यक्तिहुक्रनहे सहुलियत दरमे ऋण फेन लगानी कैना आग्रह करल रही ।
कार्यक्रममे सहकारीके अध्यक्ष चौधरी सहकारीसे टमान मेरिक ऋण लगानीके साथे सामाजिक कार्य करटी आइल जानकारी कराइल रहिट । उहाँ सहकारीसे कृषक तथा व्यापारीहुक्रनहे सहुलियत दरमे ऋण लगानी करटी आइल अध्यक्ष चौधरी जानकारी कराइल रहिट । ओस्टके उहाँ सहकारीसे रक्तदान, सरसफाई लगायत टमान मेरिक जनचेनतामूलक कार्य फेन करटी आइल जानकारी कराइल रहिट ।
अब्बेसम १ करोड ५४ लाख कूल पुँजी रहल सहकारीसे ९८ लाख ऋण लगानी करल अध्यक्ष चौधरी जानकारी डेलै । सहकारीके ५३३ सेयर सदस्य रहल बाटैं ।
