सुदूरपश्चिममे सक्रिय संक्रमित एक हजार नघ्लै
पहुरा समाचारदाता
धनगढी, ९ कुवाँर । सुदूरपश्चिम प्रदेशमे शुकके रोज कोरोनाके सक्रिय संक्रमित एक हजार एक पुगल बाटै ।
सामाजिक विकास मन्त्रालयसे डेहल जानकारी कैलालीमे ४८०, अछामे १२४, डोटीमे १२३, बझाङमे ११३, बैतडीमे ७९, कञ्चनुरमे ३४, दार्चुलामे ३७ ओ डडेल्धुरामे ११ करके १ हजार एक जाने सक्रिय संक्रमित रहल बाटै । कलेसे बाजुरामे सक्रिय संक्रमित शुन्य रहल मन्त्रालय जनैले बा ।
ओस्टेक शुकके रोज सुदूरपश्चिमके टमान प्रयोगमे कैगिल परिक्षणमे ५८ जाने लौवा संक्रमित ठपल बाटै । सेती प्रादेशिक अस्पतालके प्रयोगशालामे ७, डोटी अस्पतालके प्रयोगशालामे करल परिक्षणमे २६, बैतडी अस्पतालके प्रयोगशालामे ६ जाने ओ बझाङ अस्पतालके प्रयोगशालामे १९ करके ५८ जनहनमे संक्रमण पुष्टि हुइल बा । जेम्ने कैलालीके ५, अछामके २४, बझाङ १९, बैतडीके १, कञ्चनपुरके १ ओ दार्चुला जिल्लाके ६ जाने करके ५८ जाने रहल मन्त्रालय जनैले बा ।
ओस्टेक पछिल्का २४ घण्टामे देशभर १३ सय १३ जनहनमे कोरोना भाइरस (कोभिड–१९) के संक्रमण पुष्टि हुइल बा । देशभरके प्रयोगशालामे १२ हजार २६२ नमुना परीक्षण करेबेर ४५३ महिला ओ ८६० पुरुषमे संक्रमण पुष्टि हुइल हो ।
यीसंगे कुल संक्रमितके संख्या ७० हजार ६१४ पुगल बा । ओइने मन्से ४५९ जानेक मृत्यु हुइल बा कलेसे ५१ हजार ८६६ संक्रमणमुक्त हुइल बाटै । पछिल्का २४ घण्टामे केल १,४५५ जाने संक्रमणमुक्त हुइल स्वास्थ्य तथा जनसंख्या मन्त्रालय जनैले बा ।
