बस्तीमे पैठल गोहुवाके उद्धार

इस्मिता कुश्मी
जोशीपुर, १० कुवाँर । कैलालीके जोशीपुर गाउँपालिका वडा नम्बर २, बर्गदहीमे आइल गोहुवक उद्धार कैगिल बा ।

शुकके रात ११ बजे स्थानीय तीर्थराम चौधरीके घरेक लग्गेक कुलियामे आइल उ गोहुवाहे शनिच्चरके रोज सुरक्षित स्थानमे छोरल इलाका प्रहरी कार्यालय जोशीपुर जनैले बा । रातके खोबसे कुकुर भुके लागलपाछे निकारके हेरेबेर घर लग्गेक कुलियामे गोहुवा डेखल स्थानीय तीर्थराम बटैलै ।

रात ११ बजे फेला परल गोहुवा स्थानीयहुकनके नियन्त्रणमे लेहे प्रहरीहे खबर करलपाछे शनिच्चरके रोज इलाका प्रहरी कार्यालय जोशीपुरके प्रमुख प्रहरी नायव निरीक्षक वीरबहादुर बोहराके अगुवाईमे उद्धार करल रहे ।

प्रहरी नायव निरीक्षक बोहरा उ गोहुवामे सुरक्षित स्थान मोहना लडियामे छोरल जनैले बा । उ गोहुवा करिब १८ केजी तौल ओ पाँच फिट लम्बाई रहल स्थानीय तीर्थराम जनैलै ।