ट्रेससे ५ सय २० जनहनहे सीपमूलक तालिम डेना

पहुरा समाचारदाता
धनगढी, ११ कुवाँर । ट्रेस प्रालि धनगढी कैलाली कञ्चनपुर जिल्लाके ५ सय २० जनहनमे बजार माग अनुसारके सीप विकास तालिम डेना जनैले बा ।

यूरोपियन यूनियनके आर्थिक तथा व्रिटिस काउन्सिल दक्षताके व्यवस्थापन सहयोगमे ‘सीप तथा सम्मानित रोजगार परियोजना’ अन्तर्गत सीप विकास तालिम संचालन करे लागल हो ।

अँटवारके रोज धनगढीमे परियोजना सम्बन्धी सरोकारवाला निकायहुकनसे सुझाव संकलनके लाग करल छलफल कार्यक्रममे टे«स प्रालि धनगढीके कार्यकारी निर्देशक छत्रबहादुर बम बजार माग अनुसार सीप विकास तालिम संचालन करके रोजगारी सृजना करटी यूवाहे प्रोमोट करे लागल बटैलै । उ परियोजना अन्तर्गत ४ सय जनहनमे सुरुसे तालिम डेना, ६० जाने ठोर–ठोर सिखल यूवाहे ओ ६० जाने सिखल यूवाहुकनहे तालिम डेहल उहाँ जनैलै ।

उहाँ कहलै, पहिले–पहिले यहाँके भवन बनैना, कठुवा काम कैनासे लेके ढेर जैसिन काम बाहेरके इन्डियन कालिगढ लोग करिट, अब्बे तालिम लेके यिहेक मनै काम करल विल्गैठै, बजार माग अनुसार सीपमुलक तालिम डेलेसे ढेर यूवा अपने देशमे रोजगार पैही ।’

ट्रेस प्रालि धनगढीसे संचालित सीप तथा सम्मानित रोजगार परियोजना अन्र्तगतके संचालन हुइटी रहल तालिम पश्चात ४ सय जाने मन्से ८० प्रतिशत रोजगारीमे अवद्ध हुइना, ६० जाने ठोर–ठोर सिखल यूवाके अब्बे कमैटी रहल मन्से २० प्रतिशत आम्दानी बह्रना ओ ६० जाने सिखल यूवा प्रशिक्षक बन्के ओकर दोब्बर आम्दानी बह्रना कार्यकारी निर्देशक छत्रबहादुर बम बटैलै ।

छलफल कार्यक्रममे टे«स प्रालि धनगढीके ‘सीप तथा सम्मानित रोजगार परियोजना’ प्रोग्राम म्यानेजर टेकबहादुर बलायर परियोजना सन २०२० मार्च १ तरेखसे संचालन हुइल मने कोरोना भाइरसके कारण ६ महिनासम काम करे नइसेक्के ढिलाई हुइल बटैलै ।

परियोजनाके अवधि सन २०२१ अगस्त ३१ सम रहल ओरसे आब हाली काम सुरुवाट हुइना उहाँ जनैलै । यी परियोजना यूवाहुकनहे दिगो रुपमे ज्यालादारी तथा स्वरोगार बृद्धि कैटी रोजगारदाता ओ और सरोकारवालाहुकहे संलग्न कराके उद्योग व्यवसाय, समुदायके आवश्यकता अनुसार निर्माण क्षेत्रमे कार्यात्मक सम्बनध तथा समन्वय स्थापना करटी जैना उहाँ बटैलै । ट्रेस प्रालि धनगढीसे अभिन सिटिइभिटीसे मान्यता प्राप्त करिब १० हजार यूवाहे टमान मेरिक तालिम डेहल बटैलै ।

प्राविधिक शिक्षा तथा व्यवसायिक तालिम परिषद सुदूरपश्चिम प्रदेश धनगढीके देव बहादुर धामी तालिमके लेवल बह्रैटी जाके दक्ष बनैना जरुरी रहल बटैलै । उहाँ कहलै यहाँके यूवाहे सीपमुलक तालिमसंगे व्यवसाय संचालनके लाग आर्थिक सहयोग करलेसे स्वदेशमे रोजगार बनाई सेक्जाई ।