सामुदायिक भवनके उद्घाटन
सुधराम दहित
जोशीपुर, १२ कुवाँर । जोशीपुर गाउँपालिका वडा नम्बर ३ मे बनल सामुदायिक भवन समुद्घाटन हुइल बा । गाउँपालिकाके ३० लाख विनियोजित बजेट मन्से २९ लाखमे निर्माण हुइल सामुदायिक भवनके उद्घाटन अध्यक्ष रामकृष्ण चौधरी करले बाटै ।
कार्यक्रमहे सम्बोधन करटी बडका पहुना रहल उहाँ सामुदायिक भवन निर्माण उपभोक्ता समितिहे धन्यवाद ज्ञापन करटी विकास निर्माणके कार्यक्रममे स्थानीय उपभोक्ताहुकनके अपरिहार्य सहयोग रहद बटैलै ।
‘अपन गाउँठाउँमे हुइटी रहल विकास निर्माणहे हरेक स्थानीय बासीहुक्रे सहयोग करलेसे केल गुणस्तरीय विकास सम्भव बा,’ अध्यक्ष रामकृष्ण कहलै– ‘वडा नं. ३ के स्वास्थ्य समस्याहे महसुस करटी रामनगरमे स्वास्थ्य चौकीफे स्थापना कैगिल बा, युवा स्वरोजगार, महिलाहुकनके लाग सीपमूलक तालिम, टमान सडक स्तरोन्नती, कृषि क्षेत्र, शिक्षा क्षेत्रमे फे टमान कार्यक्रम बनाके बजेट विनियोजित कैगिल बा ।’
कार्यक्रमके विशिष्ट पहुना एवं पूर्व माननीय बुद्धीसागर चौधरी वडा नं. ३ मे लडिया कटान ओ डुवानके समस्या रहल ओरसे यी वडामे गाउँपालिकाहे और वडा से ढेर बजेट विनियोजित कैना अनुरोध करलै ।
ओस्टेक दुसर खास पहुना नेपाली कांग्रेसका पूर्व जिल्ला उपसभापति विरबहादुर हमाल स्थानीय सरकार आइलपाछे नेपाली कांग्रेससे यी क्षेत्रमे टमान विकास निर्माणके कार्यक्रम करटी रहल बटैलै । वहाँ नेपाली काँग्रेससे जोशीपुर क्षेत्रमे ढेर उदाहरणीय कार्य करके आमनागरिकके मन जिटल बटैलै ।
जोशीपुर गाउँपालिका वडा नम्बर ३ के अध्यक्ष किशोरकुमार कठरियाके अध्यक्षतामे हुइल कार्यक्रमहे वडा सचिव सावित्री कुश्मी सहजीकरण करले रहिट कलेसे वडा सदस्य कालीराम चौधरी स्वागत मन्तव्य व्यक्त करले रहिट ।
