कारागारके भौतिक अवस्था सुधार नन्ना सुझाव
पहुरा समाचारदाता
धनगढी, १४ कुवाँर । राष्ट्रिय मानव अधिकार आयोगके माननीय सदस्य सुदीप पाठक नेतृत्वके एक उच्च स्तरीय टोली कैलाली ओ कञ्चनपुर जिल्लाके कारागार ओ प्रहरी हिरासत कक्षके भौतिक अवस्थामे नाने पर्ना सुझाव डेले बाटै ।
कोरोना महामारीके वर्तमान अवस्थामे कारागार तथा हिरासत समेट ढेर जोखिम रहल ओरसे अवस्थाके जानकारी लेहक लाग राष्ट्रिय मानव अधिकार आयोगके टोली कैलाली कञ्चनपुरके कारागार ओ प्रहरी हिरासत कक्षके भौतिक अवस्थामे अनुगमन करटी मापदण्ड अनुसार कैदी बन्दीहुकनके स्वास्थ्य सुरक्षामे जोड डेना स्थानीय प्रशासनहे आग्रह करल रहे ।
टमान कसुर तथा अभियोगमे कारागार ओ प्रहरी हिरासतमे रहल कैन्दीबन्दीहुक्रे कोरोना संक्रमणसे सुरक्षित रहन ओ ओइनके स्वास्थ्य परिक्षण लगायत उपचारमे विशेष ध्यान पुगैना आयोगसे नेपाल सरकारके ध्यानाकृष्ट कराइल आयोगके माननीय सदस्य पाठक बटैलै ।
कारागार अनुगमनके शिलशिलामे जिल्लास्थित प्रमुख जिल्ला अधिकारी, सुरक्षा अंगके प्रमुख, जिल्ला न्यायधिवक्ता, कारागार प्रमुख, नेपाल बार एशोसियशन, नेपाल पत्रकार महासंघके प्रतिनिधिसंग कोभिड–१९ ओ कारागारमे रहल कैदीबन्दीहुकनके स्वास्थ्य सुरक्षाके अवस्थाके बारेमे छलफल हुइल रहे ।
छलफलमे सहभागी प्रमुख जिल्ला अधिकारी लगायत सुरक्षा निकायके प्रमुखहुक्रे कारागारके भौतिक क्षमता कमी ओ आवश्यक स्वास्थ्य सामग्री अभावके बावजुत सुरक्षा मापदण्डके पालन करके कैदीबन्दीहुकनके स्वास्थ्य सुरक्षामे सजग रहल जनैले रहिट ।
राष्ट्रिय मानव अधिकार आयोगसे यिहे कुवाँर ५ से २५ गतेसम देशके टमान कारागारके आवश्यक अनुगमन कैना आयोगके माननीय सदस्य, प्रदेश कार्यालयके सहसचिव, कार्यालय प्रमुख, अधिकृत सम्मिलित टोली खटल बाटै ।
