खाद्य प्रविधिसे प्रगती विवरण सार्वजनिक
पहुरा समाचारदाता
धनगढी, १४ कुवाँर । खाद्य प्रविधि तथा गुण नियन्त्रण कार्यालय धनगढी आर्थिक वर्ष २०७६/०७७ मे करल स्वीकृत वार्षिक कार्यक्रम अनुसारके प्रगती विवरण सार्वजनिक करले बा ।
मंगरके रोज पत्रकार सम्मेलनके आयोजना करके खाद्य प्रविधि तथा गुण नियन्त्रण कार्यालय धनगढी ओ मातहतके खाद्य प्रविधि तथा गुण नियन्त्रण डिभिजन कार्यालय डडेल्धुरा, डोटी ओ बैतडीसे स्वीकृत वार्षिक कार्यक्रम अनुसारके प्रगती विवरण सार्वजनिक करल हो ।
खाद्य ऐन अनुरुप खाद्य निरिक्षकहुकनसे संकलन करल टमान खाद्य समूहके २६१ ठो नमूना संकलन करल वरिष्ठ खाद्य अनुसन्धान अधिकृत नवराज दाहाल जनैलै । संकलित नमूना मन्से १२ ठो प्रतिकूल भेटलमे कार्वाही प्रक्रिया खाद्य ऐन अनुसार आघे बह्राइल उहाँ जनैलै । खाद्य ऐन प्रतिकुल पाइल चाउरके एक ठो नमूना (धनगढी उपमहानगरपालिका राहत विवरण) उप्पर खाद्य ऐन अनुसार गैल असार २५ गते कैलाली जिल्ला अदालतमे मुद्दा दायर करल वरिष्ठ खाद्य अनुसन्धान अधिकृत नवराज दाहाल जनैलै ।
खाद्य ऐन अनुसार खाद्य वस्तुके उत्पादन करके विक्री वितरण कैना आघे खाद्य उद्योग यी कार्यालयसे खाद्य अनुज्ञापत्र लेहे पर्ना व्यवस्थाहे लागु कैना खाद्य प्रविधि तथा गुण नियन्त्रण कार्यालय धनगढीसे ३६ खाद्य उद्योगहे अनुज्ञापत्र(बाँकी ३ पेजमे) नयाँ जारी करल, १७१ ठो उद्योगके अनुज्ञापत्र नविकरण करल, ६४ ठो नयाँ उद्योग स्थापनाके लाग सिफारिस करल उहाँ जनैलै ।
खाद्य बजार, होटल रेस्टुरेन्ट तथा उद्योगीहुकनके अनुगमन ओर चार ठो कार्यालयसे ५९ चो रेपिड रेस्पोन्स मोडालिटीमे समेत ठप अनुगमन कार्य सम्पन्न करल बा । खाद्य बजार, होटल रेस्टुरेन्ट तथा उद्योगीमे अनुगमनके क्रममे म्याद गुजरल, लेवल नइरहल ओ आँखीसे स्पष्ट विल्गैना करके विगरल जम्मा ५१२९.२ केजी ओ २२३४.२ लिटर खाद्य तथा पेय पदार्थ अनुमानित सात लाख नौ हजारके सामान स्थानीय निकाय, स्थानीय प्रशासन ओ मिडियाकर्मीके रोहवारमे नष्ट कैगिल जनागिल बा ।
लकडाउनके अवधिके सुरुवाटसे जेठ ३१ गतेसम स्वच्छ ओ गुणस्तरीय खाद्य पदार्थ विक्री वितरणके सुनिश्चितके लाग अनुगमन, नमूना संकलन ओ विश्लेषणके कार्य आघे बढाइल रहे । जेम्ने टमान मेरिक ४२ नमूनाके विश्लेषण करके सम्बन्धित प्रतिवेदन उपलब्ध कराइल बा ।
खाद्य प्रविधि तथा पोषण कार्यक्रम ओर सुदूरपश्चिम क्षेत्रके मौलिक पहिचान बोकल थारु समुदाय विशेष खाद्य परिकारमे आधारित परम्परागत प्रविधिके पहिचान करके उ परिकारमे पैना पौष्टिक तत्वके विश्लेषणके कार्य सम्पन्न करल वरिष्ठ खाद्य अनुसन्धान अधिकृत नवराज दाहाल जनैलै ।
जौन परिकारमे ढिक्री, बरिया, कचरिक बरिया, फुलौरी, खरिया, सिन्की, घोंघी, सिढरा, गेंगटा, पकुवा, जाँड, जाँडके झोर, डारु, महुवाके डारु रहल बाटै ।
खाद्य प्रविधि तथा गुण नियन्त्रण कार्यालय धनगढीसे खाद्य अनुज्ञापत्र जारी तथा नविकरण ओ खाद्य तथा दाना नमूना विश्लेषण ओर जम्मा ६ लाख ७८ हजार गैर कर राजश्व प्राप्त हुइल वरिष्ठ खाद्य अनुसन्धान अधिकृत जनैलै ।
आर्थिक बर्ष २०७७/०७८ मे हालसम सावन १ से कुवाँर १२ सम उद्योग अनुज्ञापत्र जारी तथा नविकरण ओ खाद्य तथा दाना नमूना विश्लेषण ओर जम्मा रु ३ लाख १८ हजार ९ सय ४० गैर कर राजश्व प्राप्त करल खाद्य प्रविधि तथा गुण नियन्त्रण कार्यालय धनगढी जनैले बा ।
खाद्य तथा दाना उद्योगके अनुज्ञापत्र जारी तथा नविकरणके क्रममे ६५ ठो खाद्य उद्योगके निरिक्षण अनुगमन करके खाद्य स्वच्छता सुधारके लाग निर्देशन डेहल बा । यिहे क्रममे कुछ खाद्य उद्योगके उत्पादनमे लेवल विवरण उल्लेख नइकरके ओ म्याद गुजरल करके जम्मा ४९२.५ केजी (अनुमानित मुल्य रु ३९ हजार ९ सय खाद्य पदार्थ जफत करके करल बा । जफत करल खाद्य पदार्थमे पिठा, मैदा, चाउमिन ओ मसला जन्यवस्तु पत्रकारहुकनके रोहवारमे मंगर नष्ट करल बा ।
कार्यक्रमके संचालन खाद्य प्रविधि तथा गुण नियन्त्रण कार्यालय धनगढीके खाद्य निरीक्षक विजय पराजुली करले रहिट ।
