वडा कार्यालयके भवन शिलन्यास

पहुरा समाचारदाता
धनगढी, १४ कुवाँर । धनगढी उपमहानगरपालिका वडा नं ८ के वडा कार्यालय भवनके बुधके शिलन्यास करल बा ।

धनगढी उपमहानगरपालिकाके प्रमुख नृपबहादुर वड, उपप्रमुख सुशीला मिश्र भट्ट ओ वडा अध्यक्ष नारायणप्रसाद बराल भवनके शिलन्यास करल रहिट । ९० लाखके लागत स्टीमेटमे निर्माण हुइटी रहल वडा कार्यालय भवन एक वर्ष भिटरे निर्माण सम्पन्न हुइना करके ठेक्का सम्झौता करल बा ।

नगरप्रमुख नृपबहादुर वड १९ ठो वडा कार्यालय मन्से अधिकांस वडाके भवन निर्माण सम्पन्न हुसेकल बटैलै । बाँकी रहल वडा कार्यालय भवनफे निर्माण अपन कार्यकाल भिटरे सम्पन्न कैना नगरप्रमुख वड बटैलै । वडा कार्यालय व्यवस्थित नइहुइटसम वडा तहके कार्य सम्पादन व्यवस्थित हुई नइसेकी नगरप्रमुख वड कहलै, टबमारे पूर्वाधार निर्माण प्राथमिकतामे पारल हुई ।

उपप्रमुख सुशीला मिश्र भट्ट वडा कार्यालयके मजा व्यवस्थापन करे सेक्लेसे ओकर मनोवैज्ञानिक प्रभाव सेवाग्राही ओ सेवा प्रदायमे पर्ना बटैली । उहाँ कहली, धनगढी उपमहानगरपालिकासे उ कारण अपने व्यवस्थित वडा कार्यालयके निर्माण सुरु करल हो । ।

वडा अध्यक्ष नारायण बराल कार्यालय निर्माणके काम समयमे सम्पन्न करेक लाग अपने निर्माण कम्पनीहे सहजीकरण कैना बटैलै ।