थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत ०६ कार्तिक २६४३, बिफे ]
[ वि.सं ६ कार्तिक २०७७, बिहीबार ]
[ 22 Oct 2020, Thursday ]
‘ निर्मला गरझुलके मुवल घटना ’

‘छाइहे रखेड–रखेड मारके टँगाडेलिस’

पहुरा | १४ आश्विन २०७७, बुधबार
  • 11
  •  
  •  
  •  
  •  
  •  
  •  
  •  
    11
    Shares
‘छाइहे रखेड–रखेड मारके टँगाडेलिस’

उन्नती चौधरी
धनगढी, १४ कुँवार ।
कुवाँर २ गते रुखुवामे गरझुलके मुवल अवस्थामे फेला परल कैलालीके पत्रकार निर्मला पहराईके घटनावारे हालसम कौनो सत्यतथ्य पटा नैलागल हो ।

पोष्टमार्टमके रिपोर्ट नैआइलओरसे उहाँके आत्महत्या हो कि हत्या कनावारे खुले नैसेकल कैलाली प्रहरी जनैले बा ।

सुखडस्थित कैलाली एफएममे काम करटी आइल २३ बरसके निर्मला ओहै कोठा लेके बैठ्टी आइल रही । भदौ २८ गते आपन बाबाक् श्राद्ध करे उहाँ घोडाघोडी नगरपालिका–४ स्थित घर गैल रही । ओकर डोसर दिन रेडियोके कामसे गैल उहाँ ओकरपाछे नैलौट्ली ।

कुवाँर ९ गते कैलालीके पत्रकार महिलाहुक्रे निर्मलाहे श्रद्धाञ्जली अर्पण करे उहाँके घर पुग्लै । ७० बरसके डाई बाटुली पहराई ओसरहुवामे बैठल कवाइटही । निर्मला मुवल घटनावारे बुझे नैपैटी उहाँक् डाई गालेभर आँस परटी कहली, ‘मोर छाइ अप्नही मरल नाइ हो । रखेड रखेडके मर्लिस् । चप्पलमे एक चुटी फेन हिल्ला नैलागल रहिस् । मने शरीरभर माटि किल रहिस ।’

उहाँ आघे कहली, ‘पापी मोर छाइक् हत्या करके रुखुवाम् टाँगाडेहल । घाँटीमे बाँढल लसरी फेन कसकिल नाई रहे । शरीरभर रगत ओ सोमला परल बिल्गाइ टहे । मने प्रहरी उल्टे हम्रहिन्से प्रमाण खोजाटा । यि कहाँक् न्याय हो ?’

निर्मलाक् डाई दोषीहे कडा कारबाही करेक पर्ना माग राख्ली । ५ डाडा ओ ४ डिडी बहिनिया रहल निर्मला १० औं अर्थात् सबसे छोट्की हुुइटी । सक्कु जहनके भोज होसेकल रहिन् । भोज भोके फेन अलग अलग होसेकल रहै । आपन डाइक् हेरचाह निर्मला अप्नही करटी आइल रही । उहाँक् बाबा ढिउर पहिलेही ओरासेकल बाटै ।

भोजक् बारेम् विवाद

निर्मलाक् घरेक् मनैन्के अनुसार, भदौ ३१ गते निर्मला रेडियो कैलालीमे बिहानके समाचार पह्रके घोडाघोडी नगरपालिका–५ पहलमानपुरके ललित जाग्रीहे भेटेक् लाग डुपहरके कोठम्से निक्रल रहि । साँझ्यासम फेन घरे नैलौटलपाछे उहाँक् घरेक् मनै सुखडस्थित ईलाका प्रहरी कार्यालयमे छाइ हेरागिल कहिके खोजीके लाग उजुरी डेलै ।

कुवाँर २ गते रुखुवामे टंगल अवस्थामे निर्मलाक् लास मिलल । ओहे दिन प्रहरी जाग्रीहे पकर सेकल रहे । घरेक् मनै जाग्री ओ साउँद थरके एक लौन्डिक् उप्पर कुवाँर ५ गते किटानी जाहेरी डेटी घटनाबारे छानबिन करके दोषीहे कडा कारबाहीके माग कर्लै । जाहेरी डेहल दिन उ लौन्डि फेन पक्राउ पर्ली ।

प्रहरीके सुरुवाती अनुसन्धानसे भदौ ३१ गते निर्मला, ललित जाग्री ओ साउँद थरके लौन्डिक्बीच बाटचित हुइल खुलल बा । ईलाका प्रहरी कार्यालय सुखडके प्रहरी नायब उपरीक्षक (डीएसपी) सागर बोहरा कहलै, ‘भदौ ३१ गते लौन्डा ओ औन्डिक् बीच बाटचित हुइल बुझगिल बा । ३० गते भोजक् विषयमे उहाँहुकनबीच विवाद हुइल बिल्गाइठ ।’

निर्मलाक् सँघरियान्के अनुसार निर्मला ओ जाग्रीबीच प्रेम सम्बन्ध रहे । उहाँ अप्ने अन्तर्जातीय भोज करे लागल कहटी सँघरियान् सुनाई ।

प्रहरी स्रोतके अनुसार त्रिकोणात्मक प्रेम सम्बन्धके कारण उहाँहुकनबीच विवाद हुइल बिल्गाइठ । पक्राउ परल लौन्डिक् डेहल बयान अनुसार निर्मलासे फोन करेबर वादविवाद हुइल ओ अप्ने भेटे बलाइल मने नैगैल बटाइल रहि । ओस्टके, जाग्री भर निर्मलासे प्रेम सम्बन्ध नैरहल प्रहरी स्रोत बटाइठ ।

पक्राउ परल डुनु जाने निर्मलाक् मुवल घटनामे अप्नेहुकनके संलग्नता रहल स्वीकार नैकर्ले हुइटै ।

डीएसपी बोहरा अनुसन्धान जारी रहल ओ पोष्टमार्टम रिपोर्ट फेन नैआइलओरसे हत्या हो कि आत्महत्या कहिके अभिनसम कहे सेक्ना बटैठै । ‘पोष्टमार्टमके रिपोर्ट आइलपाछे थप अनुसन्धान करके दोषी पत्ता लगाब,’ उहाँ कहलै ।

प्रहरी अभिनसम निर्मलाक् मोबाइल फोन भेटाइ नैसेक्ले हो ।

  • 11
    Shares

जनाअवजको टिप्पणीहरू