कैलारीके टेंढी गाउँमे कोरोना संक्रमणके दुसरा चरण

पहुरा समाचारदाता
हसुलिया, ६ कार्तिक । कैलालीके कैलारी गाउँपालिकामे पहिलचो समुदायमे कोरोना संक्रमण फैलल् पुष्टि हुइल बा ।

जिल्लाके टमान पालिकामे तीव्र रुपमे स्थानीय संक्रमण बर्हटी रहल कैलारी गाउँपालिका संक्रमणके दुसरा चरणसे मुक्त रहे । मने बुधके वडा नम्बर ८ के टेंढी गाउँमे कोरोना संक्रमण समुदायमे फैलल् पुष्टि हुइल गाउँपालिकामे कार्यरत स्वास्थ्यकर्मी कुसुम चौधरी जानकारी डेलै ।

ओहकान अनुसार धनगढीसे घर गैल उ गाउँके दुई जनहनमे कोरोना संक्रमण हुइल रहे । उहाँहुक्रनके कन्ट्याक्टमे आइल परिवारके दुई जनहनमे फेन कोरोना संक्रमण पुष्टि हुइल बा । सेती प्रादेशिक अस्पतालके प्रयोगशालामे करल परीक्षणमे बुधके एक महिला ओ औरे एक पुरुष कैके दुई जनहनके रिपोर्ट पोजेटिभ आइल चौधरी जानकारी डेलै ।

‘यिहीसे आघे, छ÷सात महिनासम कन्ट्याक्ट ट्रेसिङ करल सक्कु जनहनके नेगेटिभ रिपोर्ट आइल रहे’, उहाँ कहलै । ‘गाउँपालिकामे पहिलचो दुसरा चरणमे संक्रमण फैलल् पुष्टि हुइल बा ।’

टेंढी गाउँमे समुदायमे कोरोना फैलल्पाछे आज गाउँभरिक मनैनके स्वाब संकलन कैना तयारी करल चौधरी जानकारी डेलै । धनगढीसे जाके संक्रमित पुष्टि हुइल व्यक्ति धनगढीमे आल्मुनियम पसलमे काम कैना करल जनाइल बा ।