सुदूरपश्चिममे ठप ७५ संक्रमित ठप्लै
पहुरा समाचारदाता
धनगढी,६ कार्तिक । सुदूरपश्चिम प्रदेशमे विफेक रोज ७५ जाने कोरोना भाइरस संक्रमित ठपल बाटै । पछिल्का २४ घण्टामे कैगिल परिक्षणमे ७५ जाने संक्रमित ठपल सामाजिक विकास मन्त्रालय सुदूरपश्चिम प्रदेश जनैले बा । लौवा ठपल संक्रमितमे कैलालीमे सबसे ढेर ४९, कञ्चनपुरमे ३, बैतडीमे ७, अछाममे ५, बझाङमे १, डडेल्धुरामे २, दार्चुलामे २ ओ डोटीमे ६ जाने रहल बाटै ।
विफेक रोज ३० जाने ठिक हुके घर लौटल बाटै । विफे सम एक लाख ४ हजार ३ सय २६ जानेक स्वावके नमूना संकलन करलमे एक लाख २ हजार ३८ जानेक जाँच हुइलमे ९२ हजार ९ सय ९० जानेक कोरोना निगेटिभ ओ ९ हजार ४८ जानेक पोजेटिभ रिपोर्ट आइल रहे । कसे २२ सय ८८ जानेक नतिजा अइना बाँकी बा । सुदूरपश्चिममे कोरोनासे २१ जानेक ज्यान जासेकल बा ।
ओस्टेक विफेक रोज देशभर पछिल्का २४ घण्टामे ३ हजार ६३७ जनहनमे कोरोना भाइरस (कोभिड–१९) के संक्रमण पुष्टि हुइल बा । देशभरके प्रयोगशालामे १५ हजार २५५ नमुना परीक्षण करेबेर १२४९ महिला ओ २३८८ पुरुषमे संक्रमण पुष्टि हुइल हो ।
यी संगे कुल संक्रमितके संख्या १ लाख ४८ हजार ५०९ पुगल बा । ओइने मन्से ८१२ जानेक मृत्यु हुइल बा कलेसे १ लाख २ हजार ८२० जाने संक्रमणमुक्त हुइल बाटै ।
पछिल्का २४ घण्टामे केल ३२१५ जाने संक्रमणमुक्त हुइल स्वास्थ्य तथा जनसंख्या मन्त्रालय जनैले बा । देशभर ४४ हजार ८७७ संक्रिय संक्रमित बाटै । ओइने मन्से २६९ जानेक आईसीयू ओ ८७ जानेक भेन्टिलेटरमे उपचार हुइटी रहल बा ।
