कैलाली–कञ्चनपुरके नौ उद्योग कारवाहीमे
कैलाली वाटर इण्डष्ट्रिज ओ डेली ड्रिकिंग वाटर एण्ड मल्टी प्रोडक्सन उद्योग शिल
पहुरा समाचारदाता
धनगढी, ६ कार्तिक । खाद्य स्वच्छता मापदण्ड नइअपनाइल कैलाली–कञ्चनपुरके नौ उद्योगहे कार्वाही सहिट दुई उद्योगके उत्पादन रोक्का करटी शिल कैगिल बा ।
डस्या डेवारीहे लक्षित करके खाद्य प्रविधि तथा गुण नियन्त्रण कार्यालय धनगढीसे करल अनुगमनमे कैलाली ओ कञ्चनपुर जिल्लामे रहल २४ ठो पानी प्रशोधन तथा हल्का पेय पदार्थ उत्पादन कैना उद्योगके अनुगमन करेबेर खाद्य स्वच्छता मापदण्ड अनुरुप नइपाइल उद्योगहे खाद्य ऐन बमोजिम कारवाहीके दायरामे नानल बरिष्ठ खाद्य अनुसन्धान अधिकृत नवराज दाहाल जनैलै । जेम्ने कैलालीके ५ ओ कञ्चनपुरके ४ करके नौ उद्योग रहल उहाँ जनैलै ।
उहाँ कहलै, ‘चाड पर्वके बेला ढेर जैसिन खाद्य स्वच्छता मापदण्ड अनुरुप नइरहल खाद्य बस्तु विक्री हुइठ, उपभोक्ता सस्ता मोलके चक्करमे उपभोग्य मिति हेर्ना बानी कम रना, उहे बेला व्यापारीनसे मौकाके फाइदा उठैटी म्याद गुजरल मालसमान विक्री करजाइठ ।’ चाड पर्वमे यी गतिविधि बह्रना ओरसे खाद्य निरिक्षकके नेतृत्वमे स्थानीय प्रशासन, स्थानीय निकाय ओ सुरक्षा निकायके प्रतिनिधिहुकनके संलग्नतामे अनुगमन करल उहाँ बटैलै ।
सिलबन्दी सहित उत्पादन रोक्का हुइल उद्योगमे धनगढी उपमहानगरपालिका–५ मे रहल कैलाली वाटर इण्डष्ट्रिज ओ कञ्चनपुर जिल्ला पुनर्वास नगरपालिका–३, आइविआरडीमे रहल डेली ड्रिकिंग वाटर एण्ड मल्टी प्रोडक्सन उद्योग रहल बा । कैलाली वाटर इण्डष्ट्रिज उद्योग अपनाई पर्ना स्वच्छता मापदण्ड पालना नइकरल, मापदण्ड विपरित १ लिटर बोतलमे समेत उत्पादन करल ओरसे मापदण्ड सुधार नइकरटसमके लाग सिलबन्दी सहित उत्पादन रोक्का करल बरिष्ठ खाद्य अनुसन्धान अधिकृत दाहाल बटैलै ।
डेली ड्रिकिंग वाटर एण्ड मल्टी प्रोडक्सनफे प्रशोधित पानी उद्योगसे अपनाई पर्ना स्वच्छता मापदण्ड पालना नइकरल ओरसे मापदण्ड सुधार नइकरटसमके लाग सिलबन्दी सहित उत्पादन रोक्का करल उहाँ जनैलै । अटेर करके उत्पादन करलेसे ओइनहे खाद्य ऐन बमोजिम कारवाही कैना उहाँ बटैलै ।
ओस्टेक कार्वाहीके दायरामे परल कैलाली जिल्ला टीकापुर नगरपालिका–१ मे रहल न्यू एभरेष्ट अनुज उद्योग, लम्की–चुहा नगरपालिका–१, लम्कीमे रहल एक्वा कर्णाली अमृत एण्ड बेभरेज इष्डष्टिज, लम्की–चुहा नगरपालिका–३, चिसापानीमे रहल एनकेडीजे बेभरेज एण्ड प्याकिंग उद्योग रहल बाटै । उ उद्योगसे प्रशोधित पानीमे अपनाई पर्ना स्वच्छता मापदण्ड पालना नइकरल ओरसे उ मापदण्ड सुधार नइकरटसमके लाग उत्पादन रोक्का करल हो ।
कैलालीके टीकापुर–१ मे रहल चिसो पेय पदार्थ उत्पादन कैना उद्योग अनुज एभरेष्ट उद्योगकेफे अपनाई पर्ना स्वच्छता मापदण्ड पालना नइकरल ओरसे मापदण्ड सुधार नइकरटसमके लाग उत्पादन रोक्का करल बा ।
कार्वाहीके दायरामे परल कञ्चनपुर जिल्लाके शुक्लाफाँटा–६, झलारीमे रहल कौशल कञ्चन मिनरल्स, भीमदत नगरपालिका–४, कञ्चनपुरमे रहल ब्लु बर्ड वाटर टिटमेन्ट एण्ड सप्लायर्स, भीमदत्तनगरपालिका–२, भाँसीमे रहल शिवशंकर वाटर एण्ड मल्टि प्रोडक्सन रहल बाटै । ओइनहे प्रशोधित पानी उद्योगसे अपनाई पर्ना स्वच्छता मापदण्ड पालना नइकरल ओरसे मापदण्ड सुधार नइकरटसमके लाग उत्पादन रोक्का करल बा । अटेर करके उत्पादन करलेसे उद्योगहे खाद्य ऐन बमोजिम कारवाही कैना खाद्य प्रविधि तथा गुण नियन्त्रण कार्यालय धनगढी जनैले बा ।
ओस्टेक डस्या डेवारीहे लक्षित करके कैलाली कञ्चनपुरके टमान ठाउँक बजार, मिठाइ पसल तथा होटल अनुगमन करल बा । अनुगमनके क्रममे ढेर जैसिन पसलमे म्याद गुज्रल खाद्य पदार्थ (बेकरीजन्य, चिसो पेय पदार्थ) पाइलमे उ खाद्य पदार्थ जफत कैगिल बा । सिलबन्दी खाद्यमे लेबल नइरहल, कतिपयके लेबलमे उत्पादन मिति, उपभोग्य मिति स्पष्ट उल्लेख नइरहल चाउर, मैदा, दालजन्य वस्तु भेटल जनागिल बा । होटेल ओ उद्योगमे असल स्वच्छता अभ्यासके मापदण्ड पुरा नइकरल भेटाइलमे सुधार कैना निर्देशन डेहल बा । अनुगमन टोली स्वच्छता मापदण्ड विपरित संचालित मासु पसलहे स्वच्छता सुधारके लाग निर्देशन डेले बा ।
उहे क्रममे सुदुरपश्चिम प्रदेशके ९ जिल्लामे आयोडीनयुक्त नोन आपूर्ति कैना संस्था साल्ट ट्रेडिङ्ग कर्पोरेशन लिमिटेड धनगढीमेफे अनुगमन करल रहे ।
उपभोक्ताके उजुरी अइलेसे डस्या ओ डेवारीमेफे अनुगमन टोली तत्काल निरिक्षण अनुगमन (रयापिड रेस्पोन्स) करके प्रयोगशाला परिक्षण करटी तत्काल कारवाही कैना खाद्य प्रविधि तथा गुण नियन्त्रण कार्यालय धनगढीके बरिष्ठ खाद्य अनुसन्धान अधिकृत नवराज दाहाल जनैलै ।
