थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २३ अगहन २६४६, शुक्कर ]
[ वि.सं २३ मंसिर २०७९, शुक्रबार ]
[ 09 Dec 2022, Friday ]

इप्रका हसुलियासे डश्या डेवारीके थारु भाषामे शुभकामना सन्देश

पहुरा | ७ कार्तिक २०७७, शुक्रबार
इप्रका हसुलियासे डश्या डेवारीके थारु भाषामे शुभकामना सन्देश

जनचेतनामूलक सन्देश फेन थारु भाषामे जारी

पहुरा समाचारदाता
कैलाली, ७ कार्तिक ।
इलाका प्रहरी कार्यालय हसुलिया कैलालीसे थारु भाषामे जनचेतनामूलक सन्देश जनहितमे जारी करले बा ।

डशै डेवारी ओ छठके उपलक्ष्यमे थारुमे शुभकामना व्यक्त करटी जनहितमे जारी सन्देश फेन थारु भाषामे प्रवाह करल हो । कैलारी गाउँपालिकामे थारु समुदायके बाहुल्यता रहल ओरसे थारुमे सन्देश जारी करल इप्रका हसुलियाके इन्चार्ज नारदसिंह धामी बटैलै ।

‘कैलारी गाउँपालिकामे थारु समुदायके बहुल्यता ढिउर रहल बा’, इन्चार्ज धामी कहलै–‘सक्कु जाने सन्देश बारे कहल बात बुझिट कना उद्देश्यसे थारु भाषामे सन्देश डेहे खोजल हो ।’

यद्यपि इप्रकासे नेपाली भाषामे फेन टरटिहारहे लक्षित कैके जनचेतनामूलक सन्देश जारी करले बा । २०६८ के जनगणना अनुसार मातृभाषाके अधारमे गाउँपालिका भिट्टर सबसे ढिउर ८७.५८ प्रतिशत थारु भाषा बोलुइया रहल बाटै ।

इप्रकासे जारी सन्देशमे टरटिहारमे हुइ सेक्ना चोरी, डकैटी, जुवातास, लुटपाट, कालोबजारी, सार्वजनिक यातायात टिकटमे हुइना ठगीसे बच्ना ओ कोइ ओइसीन काम करल पता पैलेसे प्रहरीहे खबर कैना आग्रह करल बा ।

ओस्टके घरमे रहल नगद, बहुमुल्य गरगहना सुरिक्षत राखे पर्ना, रातके समयमे अपराधिक काम ओ चारीके घटना घटे सेक्ना हुइल ओरसे चनाख बैठे पर्ना सुझाइल बा ।

No description available.

ओस्टके कोरोना भाइरससे फेन बचके टरटिहार मनाइ पर्ना सन्देश डेहल बा । जारी सन्देशमे ‘घरही बैठके टिहुवार मनाइ, कोरोनाहे डुर भगाई’ सन्देश डेनाके साथे सामाजिक दुरी कायम करे पर्ना, साबुन पानीसे हात ढुइ पर्ना, माक्स ओ सेनिटाइजरके अनिवार्य प्रयोग करे पर्ना उल्लेख करल बा ।
अत्रहे किल नाइहोके महिला हिंसा ओ घरेलु हिंसा अन्त्यके लाग फेन सन्देश डेहल बा । बहुविवाह, बाल विवाहहे अन्त्य करी ओ महिलाहुक्रनहे सम्मान फेन कैना उल्लेख बा ।

कलेसे सिमा नाकासे हुइना अवैध माालसमान लन्ना ओ लैजैना, चोरी निकासी बन्द कैना फेन सन्देशमे उल्लेख करल बा । ओस्टके टरटिहारमे हुइना दुर्घटनाहे फेन न्यूनीकरणके लाग सन्देश डेहल बा । जारी सन्देशमे सवारी साधन चलाईबर चहना सक्कु कागजात लेहे पर्ना ओ क्षमतासे ढिउर यात्रु नाइ पैठे पर्ना, तीव्र गतिमे सवारी साधन नाइ चलैना, हेलमेट ओ ट्राफिक नियमके पालना अनिवार्य कैना अनुरोध करल बा ।

ओस्टके टरटिहारमे हुइना टमान खाले घटनाके गाउँघरमे मिलापत्र नाइ कैना अनुरोध करल बा । जारी सन्देशमे लिखल बा–‘टरटिहुवारमे नाकरी कचहरी, जरुरट परलबेला नेपाल प्रहरी, खबर करी १०० मे डायल करी । कानुनके पालना करी ओ समाजमे सुरक्षा अमनचयन कायम करी ।’

गाउँघर सुनसान

आने सालके डश्याके चहलपहल जस्टे थारु गाउँघरमे यी साल सुनसान जस्टे बावै । कोरोना कहरसे सबकोइ आआपन घरमे सुरक्षित बैठके प्रशासनसे जारी निशेधाज्ञासे फेन थारु गाउँघरमे करजैना टमान मेरिक सांस्कृतिक कार्यक्रम लगायत सखिया, मुंग्रहवा नाच फेन नाइ नाचगैल हो ।

डस्या अइनासे आघेसे मन्ड≥ासे चैनार गाउँ यी साल मन्ड≥ा नाइ बोजल सुनके डश्या नाइ आइल जस्टे लग्ठ्नि कैलारी–७, के भुँइयाँफाटाके चेतराम चौधरीहे । हरेक बरस डश्या डेवारीके अवसरमे आपन गाउँमे क्लबसे करजैना सांस्कृतिक ओ जनचेतनामूकल कार्यक्रम यी साल स्थगित करल उहाँ जानकारी डेलै ।

थारु होमस्टे भादा गाउँमे फेन हरेक साल नाच जैना सखिया नाच यी साल नाइ नाचलमे गाउँघर नै सुनसान बनल होमस्टे व्यवस्थापन समितिके अध्यक्ष लक्ष्मीनारायण चौधरी बटैलै ।

‘आनेसाल आन्तरिक तथा बाह्य पर्यटक होमस्टेमे अइना ओे पर्यटकहुक्रनके लाग मनोरञ्जन कैना उद्देश्यसे फेन सखिया, झुम्रा नाचसे गाउँ चैनार रहे’, अध्यक्ष चौधरी कहलै–‘कोरोनासे यी साल गाउँमे पर्यटक फेन नाइ आइल हुइट ओ नाचकोर फेन नाइ हुइठ् ।’

जनाअवजको टिप्पणीहरू