थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १७ अगहन २६४६, शनिच्चर ]
[ वि.सं १७ मंसिर २०७९, शनिबार ]
[ 03 Dec 2022, Saturday ]

सुदूरपश्चिमके ८ हजार १८ मनै कोरोना जिटलै

पहुरा | १४ कार्तिक २०७७, शुक्रबार
सुदूरपश्चिमके ८ हजार १८ मनै कोरोना जिटलै

सक्रिय संक्रमित १३१२ केल

पहुरा समाचारदाता
धनगढी, १४ कार्तिक ।
सुदूरपश्चिम प्रदेशके ८ हजार १८ मनै कोरोना भाइरससे जिटके घर लौटल बाटै ।

सुदूरपश्चिम प्रदेश सामाजिक विकास मन्त्रालय स्वास्थ्य निर्देशनलयसे डेहल जानकारी अन्सार अभिन जम्मा कुल संक्रमित ९ हजार ३ सय ५३ रहलमे कोरोनाहे जिटके ८ हजार १८ मनै घर लौटल हुइट । यी प्रदेशके नौ जिल्लामे हालसम आरटी पीसिआर विधिसे एक लाख ६ हजार ४ सय ५४ जानेक कोभिड–१९ नमूना संकलन करके १ लाख ५ हजार ५ सय ३० के परिक्षण करल निर्देशनालय जनैले बा ।

जिल्लागत सक्रिय संक्रमितके संख्या हेरेबेर सबसे ढेर कैलालीमे ५४५, अछाममे ८४, बैतडीमे ३४, बझाङ १६७, बाजुरमे ६, डडेल्धुरामे ८७, दार्चुलामे १८८, डोटीमे ११३, कञ्चनपुरमे ६९ अन्य १९ करके १३ सय १२ जाने रहल जनागिल बा ।

ओस्टेक मन्त्रालयके अन्सार शुकके रोज टमान कोभिड–१९ प्रयोगशालामे करल परिक्षणमे ठप ४१ जनहनमे संक्रमण पुष्टि हुइल बा । जेम्ने कैलालीके १६, कञ्चनपुरके ९, बझाङके १०, डडेल्धुराके ५ ओ डोटीके एक जाने रहल बाटै । कलेसे ७९ जाने ठिक हुके घर लौटल बाटै ।

सुदूरपश्चिम प्रदेशमे अभिन कोरोनासे ज्यान गुमुइयाके संख्या २३ पुगल बा । जम्ने कैलालीके ११ जाने, बझाङके ३, अछाम ओ बाजुराके २/२ जाने ओ बाँकी जिल्लाके एक/एक जाने रहल बाटै ।
ओस्टेक शुकके रोज देशभर ३५१७ जनहनमे कोरोना भाइरस संक्रमण पुष्टि हुइल बा ।

स्वास्थ्य तथा जनसंख्या मन्त्रालयके अनुसार १४ हजार ९८९ जानेक परीक्षण हुके २१५६ पुरुष ओ १३६१ महिला करके ३५१७ जनहनमे संक्रमण पुष्टि हुइल हो । यी संगे नेपालमे कोरोना भाइरस संक्रमितके संख्या १ लाख ६८ हजार २३५ पुगल बा ।

पछिल्का २४ घण्टामे ४०९६ जनहनमे संक्रमणमुक्त हुइल बाटै । यी संगे संक्रमणमुक्त हुइलके संख्या १ लाख २८ हजार ९५८ रहल बा । सक्रिय संक्रमितके संख्या ३८ हजार ३५७ रहल बा । हालसम कोरोना भाइरस संक्रमणके कारण ९२० जानेक मृत्यु हुइल बा ।

कोरोना संक्रमितके लहास भाँठल कब्रस्तान सिल

कोरोनासे ज्यान गुमाइल महिलाके लहास भाँठल धनगढी नगरपालिका वडा नम्बर १ मे रहल कब्रस्तान सिल करल बा । धनगढी उपमहानगरपालिका प्रवक्ता तथा वडा नम्बर १ के वडाध्यक्ष सन्तोष मुडभरीके रोहभरमे उ क्षेत्र सिल करल हो । जिल्ला प्रशासन कार्यालयमे सरोकारवालाहुक्रन बीच छलफल करेबेरफे कौनो निस्कर्ष नइआइलपाछे दुसर निर्णय नइहुइटसमके लाग कब्रस्तान सिल करल धनगढी उपमहानगरपालिकाके प्रवक्ता सन्तोष मुडभरी बटैलै ।

सेती प्रादेशिक अस्पतालके कोभिड अस्थायी अस्पतालमे उपचारके क्रममे बिफेक सकारे ज्यान गुमाइल कोरोना संक्रमितके महिलाके शव स्थानीय प्रशासन ओ नेपाली सेनाके टोली बस्ती बिचमे रहल कब्रस्तानमे गारल रहे । मानववस्तीसंगे रहल कब्रस्तानमे कोरोना संक्रमितहे गारल कहटी आक्रोशित स्थानीयहुक्रे कब्रस्थानके गेटमे ताला लगैले बाटै । ओइने उहाँ गारल लहास निकारके औरे ओर व्यवस्थापन कैना माग करटी रहल बाटै ।

धनगढी उपमहानगरपालिका वडा नम्बर २ क ५७ बरसके महिलाके सेती प्रादेशिक अस्पतालमे बिफेक सकारे ज्यान गैल रहे ।

सम्बन्धित समाचार

ठप ३५ सय १७ जनहनमे कोरोना संक्रमण

जनाअवजको टिप्पणीहरू