सडक क्षेत्राधिकारमे पर्ना संरचना अपनही भस्कैलै
पहुरा समाचारदाता
धनगढी, १४ कार्तिक । धनगढी उपमहानगरपालिका वडा नम्बर ५ के गम्भीरसिंह बम सडक क्षेत्राधिकार भिटर पर्ना घर संरचना अपनही भस्कैले बाटै ।
क्षेत्रीय शहरी विकास आयोजना अन्तर्गतके सडक निर्माणके काम सुरु हुइना हुइलपाछे बम सडक क्षेत्राधिकार भिटर पर्ना २ सटर सहित ४ कोठाके पक्की भवन भस्काइल हुइट ।
धनगढी उपमहानगरपालिकाके प्रवक्ता सन्तोष मुडभरी नेपाली कांग्रेसके नेताफे रहल बम मिस्त्री लगाके घर भस्काइल बटैलै ।
उपमहानगरपालिकासे सडक क्षेत्राधिकारमे पर्ना संरचना भस्कुइया घरधनीहे आदर्श नगरवासीके रुपमे सम्मान कैना, भस्काइल भागके नक्सापासमे कर छुट कैना, उहे भागमे रंगरोगन करेबेर सहयोग कैना निर्णय करल प्रवक्ता मुडभरी बटैलै । ‘नगरके विकास हमार सक्कुजे चाहके केल सम्भव हुइना हो प्रवक्ता मुडभरी कहलै, ‘सडक क्षेत्राधिकार भिटर पर्ना संरचना भस्काके सहयोग कैना सक्कु नगरवासीसंग अनुरोध करटी ।’
नगरके विकासमे केक्रो अवरोध करे नइहुइना घर धनी बम बटैलै । ‘क्षेत्रीय शहरी विकास आयोजना अन्तर्गतके यी सडक १६ मिटरके बन्टी बा बम कहलै, कम क्षेत्राधिकारमे मोर संरचना पर्ना हुइल ओरसे मै अपनही भस्कैना सुरु करल हु ।’
मेनरोड बिस्तार हुइना सुरु करलेसे अपने उहाँ रहल अपन सडक क्षेत्राधिकारमे पर्ना संरचना भस्काके सहयोग सहयोग कैनाफे बम बटैलै ।
