हिंसा प्रभावितहुकनहे नगद सहयोग

पहुरा समाचारदाता
धनगढी, १५ कुवाँर । दलित महिला अधिकार मञ्च नेपाल (डिडब्लूआरएफ) नेपालसे कोरोना भाइरससे कारण हुइल बन्दाबन्दीके अवधिमे हिंसामे परलहुकनहे नगद आर्थिक सहयोग करले बा ।

डिसिएके आर्थिक सहयोगमे मञ्चसे हिंसा प्रभावितहुकनहे जिविकोपार्जन, कानूनी सहायता ओ उपचारके लाग प्रति व्यक्ति नगद रु १० हजार ५०० के दरसे सहयोग करल कर्यक्रम संयोजक सृर्जना पराजुली जानकारी डेली ।

उहाँ कैलारी गाउँपालिकाके १ जनहनहे कानूनी सहायता, ५ जनहनहे जिविकोपार्जन ओ १ जनहनहे उपचारके लाग उ रकम हस्तान्तरण करल बटैली ।

ओस्टेक गौंरीगंगा नगरपालिकामे ५ जनहनहे जिविकोपार्जन ओ १ जनहनहे कानूनी सहायताके रकम सहयोग करल हो । रकम हस्तान्तरण कार्यक्रममे दलित महिला अधिकार मञ्च नेपालके अध्यक्ष सावित्रा घिमिरे, कैलारी गाउँपालिकाके उपाध्यक्ष लक्ष्मी सत्गौवा ओ प्रशासकीय अधिकृत खगेन्द्र जोशी लगायतके उपस्थिति रहल रहे ।