लकडाउनमे ११४ महिला हिंसाके उजुरी
पहुरा समाचारदाता
धनगढी, १५ कुवाँर । महिला पुनःस्थापना केन्द्र (ओरेक) कैलालीसे लकडाउनके अवधिमे कैलालीमे १४ ठो बलात्कारके घट्ना हुइल तथ्यांक सार्वजनिक करले बा ।
६ महिना हुइल लकडाउनके अवधिमे ओरेकके सम्पर्कमे आइल किल १४ ठो बलात्कारके घट्ना हुइलेसे फेन आउर ढिउर फेन हुइ सेक्ना ओरेक नेपाल कैलालीके संयोजक विनु राना जानकारी डेली ।
लकडाउनमे कैलालीमे ओरेकमे एक सय १४ ठो महिला हिंसाके उजुरी परल बावै । प्लान इन्टरनेशनल नेपालके सहयोगमे लैंगिक संवेदनशिलतामे रिपोर्टिङके लाग स्थानीय सञ्चार माध्यमसे करल अन्तक्र्रिया कार्यक्रममे जानकारी करागिल हो ।
ओरेक कैलालीके संयोजक विनु रानाके अनुसार कोरोनासे सिर्जित लकडाउनमे महिला हिंसा घटना ढिउर हुइल बटैली । ‘हमार संस्थामे एक सय १४ महिला हिंसाके उजुरी परल बावै,’ उहाँ कहली । ‘सक्कुओर बन्द रहल अवस्थामे अत्रा घटनाके संस्थामे उजुरी अइना फेन ढिउर हो ।’
ओरेक कैलाली लकडाउनमे दुई सय १४ जनहनहे मनोसामाजिक परार्मस डेहल बा कलेसे टमान माध्यमसे एक सय २५ जनहनहे ओ प्रत्यक्ष रुपमे ८९ जनहनहे मनोसामाजिक परार्मस डेहल जनैले बा । संयोजक राना ३८ परिवारहे पारिवारिक रुपमे मनोसामाजिक परार्मस डेहल बटैली । ओरेक कैलालीमे ५५ ठो महिला हिंसा सम्बन्धित मुद्दा दर्ता हुइल बावै ।
लकडाउनमे २१ ठो यौन हिंसा, ७ ठो बहुविवाह, ११ आत्महत्या लगायत घरेलु हिंसाके ढिउर घट्ना घटल संयोजक राना जानकारी डेली ।
उ कार्यक्रममे कैलालीके टमान सञ्चारमाध्यममे कार्यरत पत्रकाहुक्रे महिला हिंसा न्यूनीकरणके लाग सञ्चार माध्यमके भूमिका बारेम फेन छलफल हुइल रहे । सहभागी पत्रकाहुक्रे सञ्चारमाध्याम ओ महिला हिंसामे कार्यरत संस्थाके सहकार्य आवश्यक रहल सुझाब डेहल रहिट ।
