थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २९ सावन २६४६, अत्वार ]
[ वि.सं २९ श्रावण २०७९, आईतवार ]
[ 14 Aug 2022, Sunday ]

सुदूरपश्चिमके पहाडी जिल्लामे नियमित विमान उरीः मन्त्री भट्टराई

पहुरा | १७ आश्विन २०७७, शनिबार
सुदूरपश्चिमके पहाडी जिल्लामे नियमित विमान उरीः मन्त्री भट्टराई

पहुरा समाचारदाता
धनगढी, १७ कुवाँर ।
संस्कृति, पर्यटन तथा नागरिक उड्ड्यन मन्त्री योगेश भट्टराई सुदूरपश्चिम प्रदेशके पहाडी जिल्लामे आब नियमित विमान उर्ना बटैले बाटै ।

शनिच्चरके धनगढी विमान स्थलमे सञ्चारकर्मीहुक्रनसे बात बट्वाइटी मन्त्री भट्टराई तत्काल पहाडके ३ जिल्लामे विमान पुग्ना ओ बाँकी जिल्लामे फेन विमान पुगैना योजना रहल बटैलै ।

पहाडी ३ जिल्लाके हवाई उडान सेवाके परीक्षण उडानके लाग धनगढी पुगल मन्त्री भट्टराई पहिल चरणमे बैतडी, डोटी ओ बझाङमे विमान सुरु हुइना ओ ओकर लगत्ते दार्चुला ओ अछाममे फेन सुरु कैना योजना रहल सुनैलै ।

बैतडी, डोटी ओ बझाङमे अँठ्वारके २ दिन विमान पुगैना लक्ष्य रहल उहाँ बटैलै । उहाँ सुदूरपश्चिम प्रदेशमे पहाडी जिल्लामे विमान सुरु हुइलेसे सहज हुइना विश्वास व्यक्त करलै । उहाँ परीक्षण किल नाइहोके नियमित उडानसमेत हुइना दाबी करले बाटै ।

शनिच्चरके मन्त्री भट्टराई सहित १६ जाने यात्रु लेके धनगढीसे जहाज डोटी पुगल बा । टोलीमे मन्त्री भट्टराईसहित संघीय सांसद ओ प्रदेशके उद्योग पर्यटन वन तथा वातावरण मन्त्रीसमेत रहल बाटै ।

शनिच्चरके नै डोटी, बैतडी ओ बझाङमे समेत परीक्षण उडानके उदघाटन हुइना मन्त्री भट्टराई बटैलै । उहाँ कहलै, ‘परीक्षण उडान सफल हुइलपाछे निजी विमान कम्पनीहे फेन धनगढीहे बेस बनाके पहाडी जिल्लामे उडान सुरु कैना आह्वान करजैना बा ।’

टोलीमे रहल प्रतिनिधि सभा सदस्य प्रेम आले पहाडी जिल्लामे नियमित उडान सुरु हुइलेसे पर्यटन प्रवद्र्धनमे ढिउर सहयोग पुग्ना बटैलै । उहाँ अपने विमान सुरु कैना घरी घरी संघीय सरकारहे आग्रह करल समेत बटैलै ।

‘मै सुरुसे पहाडी जिल्लामे विमान सुरु करे परल कहिके सरकारहे आग्रह करटी आइल बाटुँ’ उहाँ कहलै, ‘अब्बे परीक्षण उडान हुइटी बा । आब नियमित हुइना बा ।’

जनाअवजको टिप्पणीहरू