सोँस मच्छी संरक्षण सम्बन्धी सचेतना

पहुरा समाचारदाता
भजनी, १९ कुवाँर । टीकापुर नगरपालिका–७, ढुंगाना टोलमे सोँस(डल्फिन) मच्छी संरक्षण सम्बन्धी सचेतना कार्यक्रम हुइल बा ।

टीकापुर नगरपालिका वडा नं. ७ के आर्थिक सहयोग तथा डल्फिन, जलचर तथा जैविक विविधता संरक्षण नेपाल कैलालीके आयोजनामे उ कार्यक्रम हुइल हो ।

डल्फिन, जलचर तथा जैविक विविधता संरक्षण नेपालके अध्यक्ष भोजराज ढुंगानाके अध्यक्षतामे हुइल कार्यक्रमके बर्का पहुना टीकापुर नगरपालिका वडा नं. ७ के वडाअध्यक्ष रामलाल डंगौरा थारु रहल रहिट । डल्फिन क्षेत्रके विकासके लाग सक्कु जाने एकताबद्ध होके लागे पर्ना ओ वडा स्तरसे आपन सेक्ना सहयोग कैना वडा अध्यक्ष डंगौरा बटैलै ।

कार्यक्रममे डल्फिन, जलचर तथा जैविक विविधता संरक्षण नेपालके उपाध्यक्ष कल्पना ढुंगाना स्वागत मन्तव्य राखल रही । कार्यक्रममे भजनी नगरपालिका वडा नम्बर ८ के वडा सदस्य कृष्णलाल धमाला, टीकापुर नगरपालिका वडा नं. ७ के वडा सचिव लोक बहादुर बुढा शुभकामना मन्तव्य राखल रहिट ।

कार्यक्रममे भोजराज ढुंगाना ओ जयप्रसाद ढुंगानासे २५ जाने संरक्षणकर्मीहे प्रशिक्षण डेगिल रहे ।