‘कोरोना नियन्त्रणमे सरकारके लापरबाही’
पहुरा समाचारदाता
धनगढी, १९ कुवाँर । नेपाली काँग्रेस कोरोना अनुगमन समितीके सदस्य तथा नेपाल विधार्थी सघके पूर्व अध्यक्ष नैनसिह महर सरकार लापरबाही करलके कारण मुलुकमे कोरोना संक्रमण तिब्र गतिमे फैलल बटैले बाटै ।
सोम्मार धनगढीमे नेपाल पे्रस यूनियनसे आयोजना करल पत्रकार सम्मेलनमे उहाँ काग्रेससे बार–बार सरकारहे गम्भिर हुइना आग्रह करलपाछे सरकारसे चासो नइडेहल आरोप लगैलै ।
‘हम्रे सक्कु जिल्लामे पिसिआर मेसिन धारी, स्वाथ्य जाँच बढाई कहलेसेफे सरकार चासो नइडेहल उहाँ कहलै ‘प्रत्येक प्रदेशमे एक ठो कोरोना अस्पताल बनाउ कहलेसेफे सरकार नइमानल ।’ काठमाडौँमे ढेरके परीक्षण करेबेर ढेरके संक्रमित फेला परल बटैटी उहाँ मुलकभर लाखौँके परीक्षण करेबेर हजारौँ संक्रमित ठप्ना बटैलै । सरकारसे कोरोना नियन्त्रणके लाग नानल बजेटफे प्रभावकारी नइहुइल उहाँ बटैलै । ‘सरकार कोरोनाके काममे भष्ट्रचार करले बा’ उहाँ कहलै ’तीनु तहके सरकारमे कोरोनाके नाममे व्यापक भष्ट्रचार हुइल बा ।’
तीनु तहके सरकार फर्जी बिल बनाके आर्थिक अनियमितता करल समेत उहाँ आरोप लगैलै । कोरोना अनुगमन समितिसे सरकार व्यापक भष्ट्राचार करल ठहर करटी संघर्ष कैना
चेतावनी समेत डेलै । ‘हमार १९ गतेक बैठकमे संर्घषके कार्यक्रम तय कैना कार्यसूचि रहल रहे मने बैठक स्थगित हुइल उहाँ कहलै ।
फरक प्रसंगमे नेता महर आबके महाधिवेशनमे काँग्रेसमे युवा नेतृत्व अइना दाबी करले बाटै । तीन चो सम सांसद हुसेकल ओ तीन चो सम केन्द्रिय सदस्य हुसेकलहुकनहे आब अवसर डेहे नइपरल उहाँ कहलै आब लौवा युवाहे नाने परठ । काँग्रेसभिटर व्यापक गुटबन्दी रहल उहाँ स्वीकार करलै । आब चुनावमे समुह नइबनाके अक्केली–अक्केली प्रतिप्रर्धा करेबेर गुटबन्दीके अन्त्य हुइना उहाँ विश्वास व्यक्त करलै ।
सुदूरपश्चिम प्रदेशमे बलात्कार जैसिन जघन्य अपराध बढटी रहल कहटी उहाँ सरकारसे यैसिन घटना रोके नाइसेकल आरोप लगैलै । ‘सरकारसे मजा काम करे नइसेकल उहाँ कहलै, हत्या हिंसा बढाइल, विकास निर्माण रोकगिल ।’
