जलम दिनमे पत्रकार देउवासे अक्षयकोष स्थापनाके लाग सहयोग

पहुरा समाचाचरदाता
धनगढी, २० कुवाँर । नेपाल प्रेस युनियनके नेता तथा नेपाल पत्रकार महासंघ डोटीके पूर्व अध्यक्ष पत्रकार टेकेन्द्र देउवा तेजु स्मृति अक्षयकोष स्थापनाके लाग आर्थिक सहयोग करले बाटै ।

उहाँ अपन जन्मदिनके अवसर पारके अक्षयकोषमे १३ हजार पाँच सय ५५ रुपैंया सहयोग करल हुइट । नेपाल प्रेस युनियन डोटीसे स्व. पत्रकार तेजबहादुर खड्का (तेजु)के स्मृतिमे अक्षयकोष स्थापना करे लागल हो । डोटी युनियनके संस्थापक अध्यक्ष समेत रहल पत्रकार खड्का बाजुराके
बुढीनन्दा धार्मिक तथा पर्यटकीय स्थलके रिपोर्टिङ करके लौटन क्रममे बेपत्ता हुइल रहिट । वेपत्ता रहल खड्काके तीन बर्षपाछे केल कंगाल भेटलमे डिएनए ओ घटना स्थलमे भेटल सामग्रीके आधारमे उहाँक मृत्यु हुइल पुष्टि हुइल रहिट ।

स्व. पत्रकार खड्का मिलनसार, मेहनती ओ लोकप्रिय सहकर्मी हुइल स्मरण करटी देउवा अक्षयकोष स्थापना करके उहाँहे अमर रख्न डोटी शाखाके अभियानहे सफल पार्न जन्मदिनके अवसरमे सहयोग करल बटैलै । युनियनसे स्व. संस्थापक अध्यक्ष खड्काके स्मृतीमे अक्षयकोष स्थापना करके टमान व्यक्ति संघ संस्थाहुकनसंग सहयोग आह्वान करल शाखाके अध्यक्ष प्रकास बम जानकारी डेलै । युनियनसे अक्षयकोष स्थापना कैना निर्णयसंगे सहयोग आह्वान करलपाछे टमान व्यक्तिहुक्रे सहयोग करटी आइल अध्यक्ष बम बटैलै ।

शाखाके सचिव पवन महरा अक्षयकोषमा रकम जम्मा कैना पत्रकार देउवाहे जन्मदिनके शुभकामना सहित धन्यवाद ज्ञापन करले बाटै । अक्षय कोषमे रकम जम्मा हुइलपाछे स्व. खड्काके नाउँसे पत्रकारिता पुरष्कारके घोषणा करके पत्रकारीता क्षेत्रमे योगदान पुगैना पत्रकारहुकनहे सम्मान कैना बटैलै । स्व. खड्का नम्मा समय रेडियो नेपाल क्षेत्रीय प्रशारण केन्द्र दिपायलमे कार्यरत रहिट । उहाँ लोकप्रिय कार्यक्रम प्रस्तोता रहित । पछिल्का समय उहाँ बाजुरामे रहल रेडियो बुढीनन्दा एफएममे कार्यरत रहिट ।