जनप्रतिनिधिहुक्रनसे अन्तरक्रिया कार्यक्रम
पहुरा समाचारदाता
हसुलिया, २३ कुवाँर । राष्ट्रिय मानव अधिकार आयोगके आयोजनामे कैलारी गाउँपालिकाके जनप्रतिनिधिहुक्रनसे अन्तरक्रिया कार्यक्रम हुइल बा ।
अन्तरक्रिया कार्यक्रममे वेरोजगार रहल युवाहुक्रनके लाग गाउँपालिकासे डेजैना टमान स्वारोजगार तथा सीपमूलक युवा लक्षित कार्यक्रम बारे अन्तरक्रिया हुइल रहे । ओस्टके कोभिडसे प्रभावित वेरोजगार हुइल युवाहुक्रनके लाग गाउँपालिकासे डेना टमान मेरिक सहयोग लगायतके विषयमे छलफल हुइल रहे ।
कार्यक्रममे राष्ट्रिय मानव अधिकार आयोगके प्रमुख झंकर रावल गाउँपालिका अन्र्तगतके युवा खास कैके का कारणसे बाह्य देशमे कमाई जैठै, वहाँ जाके कौन कौन मेरके काम कैठै, बाहर गैल युवाहुक्रनके गाउँपालिकामे डाटा राखल बा कि नाइ, ओ कोरोना प्रभावितसे वेरोजगार बनल युवाहुक्रनके लाग गाउँपालिकासे कौन कौन मेरिक कार्यक्रम लानल बारे जानकारी लेहल रहिट ।
कार्यक्रममे गाउँपालिका अध्यक्ष लाजुराम चौधरी गाउँपालिकासे कोरोना प्रभावित वेरोजगार युवाहुक्रनके लाग गाउँपालिका टमान मेरकि कार्यक्रम लानल जानकारी कराइल रहिट । उहाँ उहाँहुक्रनके लाग सीपमूलक, आयआर्जन, मछरीपालन, तरकारी खेती लगायतके अनुदान सहयोगके कारर्यक्रम लानल जानकारी कराइल रहिट ।
कार्यक्रममे गाउँपालिकाके उपाध्यक्ष लक्ष्मी सत्गौंवा, प्रत्येक वडाके वडा अध्यक्ष, प्रमुख प्रशासकीय अधिकृत खगेन्द्र राज जोशी, सामाजिक शाखा प्रमुख यगम कलेल, शिक्षा शाखा प्रमुख गणेश मिश्र, इलाका प्रमुख नारायण धामी लगायतके सहभागिता रहल रहे ।
कार्यक्रममके सञ्चालन राष्ट्रिय मानव अधिकार आयोगके मानव अधिकार अधिकृत नेत्र गौतम करल रहिट ।
