प्रहरीके आजसे विशेष सुरक्षा रणनीति सुरु, साढे ५ हजार प्रहरी परिचालन
पहुरा समाचारदाता
धनगढी, २५ कुवाँर । टरटिहुवार लच्क्याइलपाछे सुदूरपश्चिम प्रदेश प्रहरी डसिया डेवारी लक्षित विशेष सुरक्षा योजना तयार पर्ले बा ।
टरटिहुवारमे हुइना सम्भावित आपराधिक गतिविधीहे नियन्त्रण करके शान्ति सुरक्षा कायम करेक लाग विशेष सुरक्षा योजना तयार पारल प्रहरी जनैले बा ।
प्रदेश प्रहरी कार्यालयके प्रवक्ता बरिष्ठ प्रहरी उपरीक्षक मुकेश कुमार सिंह कहलै, ‘यी समयमे ढिउर घटना तथा दुर्घटना हुइठ । हम्रे उहिहे नियन्त्रण करेक लाग रणनीति तयार कर्ले बाटी । डसियामे हुइना जुवा, तास ओ मदिरा सेवनहे फेन नियन्त्रण करेक लाग रणनीति तयार कर्ले बाटी ।‘
डसिया लच्क्याइटी रहल बेला एक अठ्वारके अवधीमे ३ दर्जनसे ढिउर जुवाडेहुकन पक्राउ करल प्रहरीके दाबी बा ।
आज अट्वारके रोजसे लौव सुरक्षा रणनीति अनुसार प्रहरी आघे बह्रना वरिष्ठ प्रहरी उपरीक्षक सिंह बटैलै । उहाँके अनुसार सुदूरपश्चिम प्रदेशमे ५ हजार ५० प्रहरी परिचालन हुइना हुइल बाटै ।
प्रदेशके ९ जिल्लामे थप प्रहरी परिचालन करके अपराध हुई सेक्ना स्थानमे प्रहरीहे तयारीमे रहेक लाग निर्देशन डेहल जनागिल बा ।
जिल्ला प्रहरी कार्यालय कैलाली, कञ्चनपुर, डडेल्धुरा ओ डोटीमे थप प्रहरी परिचालन करगिल बा । कैलालीमे ओ कञ्चनपुरमे ५०/५० ओ डोटी तथा डडेल्धुरामे १०/१० जाने प्रहरी थप करगिल बा ।
डसिया, डेवारी ओ छठसम प्रदेशके ९ जिल्लामे सीमा नाकाके नियमन, मोबाइल गस्ती, राजमार्ग स्कर्टिङ, पैदल गस्ती, सादा पोसाकमे प्रहरी परिचालन, यात्रु सहायता कक्ष लगायतमे प्रहरी खटैना प्रहरी उपरीक्षक सिंह बटैलै ।
‘ढिउर भीड हुइना ४० स्थानमे यात्रु सहायता कक्ष तयार हुइटा,’ उहाँ कहलै, ‘तोकल दरसे ढिउर भाडा लेलेसे यात्रु ठग्न वस व्यवसायीहुुकन कारबाही कर्ना रणनीति तयार कर्ले बाटी ।’
विशेष अवस्थाके लाग ७१४ जाने प्रहरीहुुकनके टोली समेत तयारी अवस्थामे रहल उहाँ जानकारी डेलै ।
