धनगढी उपमहानगरसे ४२ सय ५४ के पीसिआर परीक्षण
पहुरा समाचारदाता
धनगढी, २५ कुवाँर । धनगढी उपमहानगरपालिकासे अँटवार सकारेसम लक्षण विल्गाइल ओ कन्ट्राक्ट ट्रेसिङ्गके आधारमे ४ हजार २ सय ५४ जानेक पीसिआर परीक्षण करल बा ।
नगर क्षेत्रमे ट्राभल हिस्ट्री नइरहल व्यक्तिमे कोरोना संक्रमण डेदलपाछे डेढ महिनासे समुदायमे क्याम्प धारके पीसिआर परीक्षण करल रहे । नगरप्रमुख नृप वड के अनुसार एक अठुवार यहोर धनगढी उपमहानगरपालिकासे अपने परिसर आघे स्थापना करल स्वाव संकलन केन्दसे स्वाव लेना करटी रहल बा । ओस्टेक करके उप–महानगरपालिकाके बेली शहरी स्वास्थ्य प्रवद्र्धन केन्द्रसे फे स्वाव संकलन कैना कामहे निरन्तरता डेहल नगरप्रमुख वड बटैलै ।
स्वाव डेनामे संक्रमित भेटल परिवारके सदस्य, प्रत्यक्ष सम्पर्कमे आइल व्यक्ति ढेर रहल स्वास्थ्य शाखाके अधिकृत लक्ष्मीराज उपाध्याय बटैलै । उहाँ कहलै, कोरोना पोजेटिभ रहलहुकनके फलोअप परीक्षणके लाग स्वाव संकलन कैना कामफे हुइटी रहल बा । दैनिक १ सय से २ सय जानेसमके स्वाव संकलन कैना काम हुइटी रहलफे उपाध्याय बटैलै ।
धनगढीमे अब्बेसम ९ सय १७ जहनमे कोरोनाके संक्रमण रहल बा । जेम्ने १ सय ८९ जाने कोरोनाके संक्रमितहुक्रे सक्रिय केश रहल बाटै । अभिनसम ७ सय २५ जाने ठिक हुइल उपमहानगरपालिका स्वास्थ्य शाखा जनैले बा ।
