तीन वर्षे पैरबी योजनाके लाग छलफल
पहुरा समाचारदाता
धनगढी, २६ कुवाँर । तीन बर्षे पैरबी कार्ययोजना तयार परटी लैगिङक हिंसा विरुद्धके अभियान संचालन करेक धनगढीमे नागरिक समाज संजालसे दुई दिने भर्जुअल कार्यशाला हुइल बा ।
नागरिक समाज संजालसे तीन बर्षे पैरबी कार्य योजना तयार करटी हानिकारक परम्परा अभ्यास विरुद्ध, लैङिक विभेदमे आधारित हिंसा विरुद्ध टमान कार्यक्रम तथा अभियान संचालन करेक लाग छलफल हुइल महिला पुनःस्थापना केन्द्र (ओरेक) कैलालीके जिल्ला संयोजक विनु राना जोशी बटैली । पालिकासे लैङिक समानता नीतिमे बालविहा विरुद्ध योजना नानल ओरसे ओकर प्रभावकारी कार्यान्वयनके लाग पालिकाहुकनसे समन्वय सहकार्य करटी अभियान संचालन कैना योजना बनाईक लाग संजालसे छलफल करल संयोजक राना बटैली । महिला पुनःस्थापना केन्द्र (ओरेक) कैलालीके आयोजनामे हुइल छलफल कार्यक्रममे लैगिङक हिंसा विरुद्धके क्षेत्रमे कार्यरत संघसंस्थासे अपन कार्ययोजना प्रस्तुत करटी सयूक्त रुपमे योजना आघे आघे बहै्रना ऐक्यवद्धता जनैले रहिट ।
नागरिक समाज संजालके पैरवी योजना निर्माण सम्बन्धी दुई दिने कार्यशालाके सहजीकरण अधिवक्ता गणेश कठायत करले रहिट । गैरसरकारी संस्था महासंघके ओरसे देबी प्रसाद खनाल, फाया नेपाल ओ पैरबी मञ्चके ओरसे गोमा आचार्य ओ सपना भण्डारी महिलासंग सम्बन्धित कार्यक्रम कहिके बजेट नइहुइलेसेफे टमान कार्यक्रममे साझेदारी करे सेक्ना महिलाके टमान सवालमे आधारित रहिके सहयोग कैना प्रतिवद्धता जनैलै ।
नारी उत्थान मञ्चके ओरसे निर्मला बागचन्द न्यायिक समितिसंग टमान कार्यक्रम करल ओ हिंसा पीडितके आवाजहे सम्बोधन कैना आवश्यक सहयोग करे सेक्ना बटैली । द्वन्दपीडित परिवारहे कैसिक स्वरोजगार बनाई सेक्जाई कहिके पैरवी कैना, पीडित महिलाहे कानूनी सहायताके साथसाथे आर्थिक सहायता कैना कार्यक्रम रहल उहाँ जनैली । महिलाके सवालमे पीडितके आवश्यकता अनुसारके सहयोग करे सेक्ना कार्यक्रम रहल उहाँ बटैली ।
याक नेपालके ओरसे सर्जुप्रसाद चौधरी महिलाके सवालमे कौनो कार्यक्रम हुइलेसे और संस्थासंग साझेदारी करे सेक्ना बटैलै । दलित महिला अधिकार मञ्चके अध्यक्ष सावित्रा घिमिरे अपन संस्थाके सक्कु कार्यक्रम महिलासंग सम्बन्धित रहल बटैली । बाल विवाह रोके लाग “किशोरी सशक्तिकरण कार्यक्रम” सञ्चालन करल, सुनौलो भविष्य कना कक्षासे ओकर शुरुवात करल उहाँ बटैली । किशोरी ओ अभिभावकसंग टमान कार्यक्रम, महिलाहुकनके न्यायमे पहुँच कार्यक्रममे प्यारालिगल ओ न्यायिक समितिके क्षमता अभिबृद्धि लगायत टमान कार्यक्रम रहल अध्यक्ष बटैली ।
कार्यक्रममे नीरङ चौधरी तेस्रो लिङगीके समस्या, नन्नराज भट्ट अपाङता रहल व्यक्तिके लाग समस्या तथा कार्यक्रमबारे ओ विष्णुमाया पौडेल महिला तथा बालकालिकाके समस्या ओ कार्यक्रम प्रस्तुत करल रहिट ।
छलफल कार्यक्रममे कमैया प्रथा उन्मुलन समाजके अध्यक्ष बसन्ती चौधरी, महिला मुक्त कमैयाहुकनके लाग सहयोगके लाग आयआर्जन कार्यक्रम संचालन करल ओ महिलाउप्पर हुइना हिंसा विरुद्धके अभियानमे सहयोग कैना कार्यक्रम रहल जनैली । इन्सेक प्रदेश कार्यालयके प्रलेख अधिकृत कृष्ण विक मानव अधिकारके क्षेत्रमे निरन्तर क्रियाशिल रहल जनैलै ।
माईती नेपालके शिबचरण चौधरी मानव बेचबिखन ओ महिला हिंसा विरुद्धके टमान कार्यक्रम संचालन करटी रहल जनैलै । जिल्ला स्तरिय अन्तर धार्मिक सञ्जाल दुखीराम चौधरी अन्तर धार्मिक सञ्जालसे महिलाउप्पर हुइना हिंसाके बारेमे जानकारी करैना ओ ओसिन कार्य धार्मिक दृष्टिकोणसे पाप कर्म हुइना बाटके प्रचार प्रसार कैना करल जनैलै । वेद अवस्थी द्वन्द डितहुकनके लाग टमान कार्यक्रम करटी रहल जनैली । नागरिक समाज संजालसे दुई दिने भर्जुअल कार्यशालाके प्राविधि सहयोग ओरेक नेपालके कार्यक्रम संयोजक गीता चौधरी करले रहिट ।
