कैलालीमे १२ बरसके लवण्डी बलात्कार करल आरोपमे एक पक्राउ

पहुरा समाचारदाता
धनगढी, २६ कुवाँर । कैलाली जिल्लास्थित बर्दगोरीया गाउँपालिका–६ के एक लउण्डा बलात्कारके आरोपमे पक्राउ परल बाटै ।

राजीपुर निवासी २८ बरसके समीर चौधरी बलात्कारके आरोपमे यिहे २५ गते पक्राउ परल इलाका प्रहरी कार्यालय सुखडके प्रमुख सागर बोहरा जनैलै । घोडाघोडी नगरपालिकाके १२ बरसके एक लउण्डीहे गैल २४ गते रातके बलात्कार करल आरोपमे आफन्तसे २५ गते सकारे इलाका प्रहरी कार्यालय सुखडमे मौखिक उजुरी डेहल रहिट ।

पीडित लउण्डीक डेहल बयान अनुसार समीरहे खोजतलास करेबेर साँझके उहाँक घरेसे पक्राउ करल इलाका प्रहरी कार्यालय सुखडके प्रमुख बोहरा जनैलै । ठप अनुसन्धानके लाग समीरहे जिल्ला प्रहरी कार्यालय कैलालीमे पठाइल सुखड प्रहरी जनैले बा ।