वनके पूर्व अध्यक्ष घाटगद्दी मन्से काठुवा चोरैलै, घटना नुकैना प्रयास
पहुरा समाचारदाता
धनगढी, २८ कुुवाँर । कैलालीके एक सामुदायिक वनके घाटगद्दीमे राखल ढिउर काठुवा चोरी हुइल घटना बाहेर आइल बा । जिल्लाके गौरीगंगा नगरपालिका वडा नम्बर ९ स्थित शिवशंकर सामुदायिक वन उपभोक्ता समूहके घाटगद्दीमे ढारल करिब २ सय क्युफिट काठुवा चोरी हुइल स्रोतके दाबी बा ।
स्रोतका अनुसार चोरीके घटनामे ओहे समुदायिक वनके पुर्व अध्यक्ष महेन्द्र देउवासहित ओहे समूहके चोरीशिकारी नियन्त्रण दलके बलबहादुर बोहराके संलग्नता रहल बटागिल बा । उहाँहुक्रे कुवाँर २४ गते रात २ बजेके समयमे घाटगद्दीमे ढारल जिन्नक लठ्ठा (गोलिया) चोराइल रहिट । चोरी हुइल उ लठ्ठाक् लम्बाइ ७ फिट रहल बा ।
समूहले महादेव माध्यमिक विद्यालयके अंगनामे घाटगद्दी बनाके ढारल रहे । कुवाँर २३ गते बिहान देउवाके समूह कच्चे ओ बरा सोझ २ ठो जिन्ना काटके ढलाइल रहै । रुखुवा ढालके छोरलपाछे उ समूह बेवारिसे कहटी संकलन करके समितिके मातहतमे नानल रहे । मने रातके उ काठुवाक् लठ्ठा बलबहादुर बोहरा ओ जीतबहादुर देउवाके ट्याक्टर प्रयोग करके चोरी करल स्रोतके दाबी बा ।
उ घटनाहे स्थानीय स्तरमे मिलैना प्रयास करगिल बा । कलेसे काठुुवाक् यकिन परिमाण अभिन नैखुलल हो । समूहके अध्यक्ष नन्दा भट्ट घाटगद्दीमे राखल १४ ठो गोलियामध्ये ४ ठो गोलिया किल चोरी हुइल बटैली ।
समूहके पूर्व अध्यक्ष देउवाके संलग्नता रहल ओ देउवा फेन अप्नही चोरी करल स्वीकार करल पुष्ट्याई करटी समूहके अध्यक्ष भट्ट उ काठुवा फिर्ता नन्ना ओ समूहके विधान बमोजिम कारवाही कर्ना समूहके छलफल हुइल बटैली ।
घटनावारे सव डिभिजन वन कार्यालय मसुरिया ओ डिभिजन वन कार्यालय कैलालीहे भर कौनो जानकारी नैडेगिल हो । समूहके अध्यक्ष नन्दा भट्ट विधान बमोजिम समूह फेन स्वायत्त निकाय रहल दाबी करटी हालसम सब डिभिजन वन कार्यालय ओ डिभिजन वन कार्यालयहे जानकारी नैकराइल उल्लेख कर्ली ।
ओहोर सव डिभिजन वन कार्यालय मसुरियाके प्रमुख सचितानन्द सिंह घटनावारे अप्नेहुकनहे जानकारी नैहुइल बटैलै । घटनावारे छानविन कर्ना उहाँके कहाइ बा । कोरोना कहरमे दुनियाक् ध्यान केन्द्रीत रहल बेला कैलाली जिल्लाके टमान सामुदायिक वन तथा राष्ट्रिय वन मन्से काठुवाक् चोरी तस्कारी बह्रल बा । मने सरोकारवाला निकाय भर कोरोना कहर कहटी प्रभावकारी रुपमे निगरानी बह्राइ नैसेकल हो ।
