बैजपुरमे लवांगी पूजा मनागिल
पहुरा समाचारदाता
धनगढी, २९ कुँवार । कैलालीके कैलारी गाउँपालिका वडा नम्बर ५ बैजपुरमे लवांगी पूजा मनागिल बा ।
गाउँक किसानहुक्रे भल्मन्सा लाल्टु बौखाहीके अंगनामे धुमधामके साथ लवांगी पूजा मनाइल हुइट । लावा धानके भात, ढिक्री लगायत टमान परिकार बनाके गाउँक डेसबन्धिया भैयाराम चौधरी ओ केसौका दिलबहादुर चौधरी देउतानहे पूजापाठ करलपाछे गाउँक किसान राहरंगी करटी लवांगी पूजा मनाइल हुइट ।
ओस्टके लवांगी पूजाके लाग गाउक भल्मन्सा लाल्टु बौखही खेन्ह्वामे धानक बोझा बहिंगाके दुनु पाँजर बाधके कन्धामे लेके खेन्हवा घुमल रहिट । असिक कर्लेसे लावा धानक बर्कट अइनाके साथे बरसभर खाइपिये पुग्ना जनविश्वास रहल बा ।
लावा धानबाली घरमे भित्र्याइनासे पहिले थारु समुदायमे लवांगी पूजा पुजजाइठ् । थारु समुदायमे समय अनुसार टमान मेरिक पुजा पुजजाइठ् । जौन मध्ये लवांगी पूजा फेन एक हो ।
लवांगी पूजा थारु समाजमे पहिले कार्तिक, अगहनमे मनाइट । मने आजकल खेतिपाति हालि हुइलक ओरसे कुवाँरमे फेन मनाइल हुइट । यी पूजा अन्धरियामे किल मनाजैना गाउँक डेसबन्धिया भैयाराम चौधरी जानकारी डेलै ।
