ट्यांकी बनल, पानी नाइआइल

कैलारीके स्थानीय शुद्ध पानी पिनासे वञ्चित

राम दहित
धनगढी, ३० कुवाँर । कैलारी गाउँपालिका अन्तर्गत टमान वडामे करोडौंके खानेपानी आयोजना निर्माणके कार्य हुइटी रहल बा । जौन अन्तर्गत हसुलिया, गदरिया, रतनपुर, रामपुर, बसौटी, उदासीपुर खानेपानी आयोजनाके ट्यांकी लगायतके निर्माण कार्य सम्पन्न होसेकल बा । मने पाइप बिछ्याइना लगायत अन्य काम आभिन बाँकी रहल ओरसे यहाँके उपभोक्ता समयमे शुद्ध खानेपानी प्रयोग कैनासे वञ्चित हुइल बाटैं ।

हसुलिया खानेपानी तथा सरसफाई उपभोक्ता समितिके अध्यक्ष भोला चौधरी खानेपानी ट्यांकी निर्माण हुइलसंगे पाइप बिछ्याइना काम फेन सम्पन्न हुइल बटैलै । मने हसुलिया–बढैपुर रोड लगायत पाइप बिछ्याइल ठाउँमे सडक विस्तारके कामसे पाइप फुटल बा । ठाउँ ठाउँमे फुटल पाइपहे पुनः मर्मत ओ अन्यत्र सारे पर्ना ओ विद्युतके लाग ट्रान्सफर्मर जडान करे पर्ना रहल ओरसे खानेपानी सञ्चालनमे ढिलाइ हुइल अध्यक्ष चौधरी बटैलै ।

२०७० मे निर्माण सुरु होके हसुलिया खानेपानी योजना ५ बरसभित्रे निर्माण कार्य सम्पन्न हुइ पर्ना रहे । मने समयमे आवश्यक बजेट विनियोजित नाइ होके हसुलिया खानेपानी लगायत यी गाउँपालिका अन्र्तगतके सक्कु खानेपानी योजना अलपत्र परल हो ।

गाउँपालिकाके प्रवक्ता तथा वडा नम्बर ७ के वडाध्यक्ष कमलप्रसाद चौधरी समयमे आयोजना सम्पन्न करक लाग अपनेहुक्रे खानेपानी उपभोक्ता समितिहे दवाफ डेना करल बटैलै । मने संघीय सरकारके बजेट ओ खानेपानी तथा सरसफाई डिभिजन कार्यालय कैलाली अन्र्तगतके योजना रहल ओरसे आवश्यक बजेट नाइहोके आयोजनाके निर्माण कार्य लम्ब्याइटी गैल अध्यक्ष चौधरीके कहाइ रहल बा ।

खानेपानी तथा सरसफाई डिभिजन कार्यालय कैलालीके इन्जिनियर गणेश उपाध्याय यी बरस न्यून बजेट रहल ओरसे सम्पन्न हुइल योजना फेन सञ्चालनमे ढिलाइ हुइ सेक्ना बटैलै ।

हसुलिया, रतनपुर, लोहरपुर, रामपुर, उदासीपुर, गदरिया खानेपानी योजना यिहे बरस सञ्चालन कैके हस्तान्तरण कैना लक्ष्य रहल इन्जिनियर उपाध्याय बटैलै । मने सम्पन्न हुइल योजनाके फेन विद्युत जडान लगायत आभिन टमान काम बाँकी रहल ओ ओकर लाग न्यून बजेटसे नाइ पुुग्ना हुइल ओरसे सञ्चालनमे ढिलाई हुइल हो ।

‘खोनेपानी योजनाके लाग आवश्यक पाइप गैल बरस किन सेकल बाटी’, इन्जिनियर उपाध्याय कहलै– ‘यी बरस बजेट न्यून बा, योजना सम्पन्नके लाग आवश्यक बजेट मन्त्रालयसे माग करले बाटी ।’

इन्जिनियर उपाध्याय आघे कहलै–‘बजेट टे ठोर ठोर सक्कु योजनामे छुट्याइल बा, उ बजेटसे ढिउर चीज निर्माण हुइ नाइ सेक्ना ओ बाँकी रहल संरचना निर्माण हुइ नाइ सेकल ओ विद्युतीकरण, कनेक्सन लगायतके काम कैना बाँकी रहल बा । थप बजेट समयमे आइ कलेसे यिहे आर्थिक बरसभित्रे खानेपानी सञ्चालनमे आइसेकी ।’

ढिउर बरससे सञ्चालनमे रहल मने सम्पन्न हुइ नाइ सेकल कैलाली ओ कञ्चनपुरमे रहल क्रोनिक प्रोजेक्टके लाग खानेपानी तथा सरसफाई डिभिजन कार्यालय कैलाली यी बरस ३९ करोड थप बजेट मन्त्रालयसे माग करले बा ।

गाउँपालिका भिट्टर निर्माधिन सक्कु खानेपानी योजना सञ्चालनमे अइलेसे साधारण नल्का तथा आर्सेनिकयुक्त पानी पिटी रहल यहाँके उपभोक्ता शुद्ध खानेपानी उपभोग करे पैना बाटै ।