सेती प्रादेशिक अस्पतालमे जनशक्ति अभाव
पहुरा समाचारदाता
धनगढी, ३० कुवाँर । कोरोना भाइरस संक्रमित होके जटिल अवस्थाके बिरामी बर्हटी रहल बेला सेती प्रादेशिक अस्पताल धनगढीमे जनशक्तिके अभाव हुइ लागल बा ।
अस्पतालके कोभिड–१९ उपचार विभागके प्रमुख डा.शेरबहादुर कमर बिरामीहे अक्सिजन डेना, भेन्टिलेर मेसिन सञ्चालन कैना, बेहोस कैना लगायतके उपचार व्यवस्थापनमे खटे पर्र्ना एनेस्थेसिया चिकित्सकके अभाव रहल बटैलै ।
अस्पतालमे बेहोस करैना एक जाने किल चिकित्सक कार्यरत रहलमे कुछ यहोर थप एक जाने एनेस्थेसिया चिकित्सक आइल बाटै, उहाँ कहलै, जटिल अवस्थाके बिरामी थप बर्हटी जाके उपचार व्यवस्थापनमे समस्या हुइटी रहल बा । अस्पतालमे दश आइसियु (सघन उपचार कक्ष) ओ दश भेन्टिलेटरके व्यवस्थापन करल बा । जटिल अवस्थाके बिरामी बर्हेबर आइसियु भेन्टिलेटरके फेन अभाव हुइना अस्पताल जनैले बा ।
अस्पतालके कोरोना अस्थायी अस्पतालमे हाल आइसियुमे पाँच जाने ओ भेन्टिलेटरमे तीन जाने कोरोना संक्रमितके उपचार व्यवस्थापन हुइटी रहल बा । आइसोलेसनमे ३६ जनहनके उपचार व्यवस्थापन हुइटी रहल बा ।
डा.कमर पाछेक दिनमे समुदायमे कोरोना संक्रमण फैललेसे फेन सर्वसाधारणसे टोकल स्वास्थ्य सुरक्षाके मापदण्ड पालना कैना हुइटी रहल कमी कमजोरीके कारण संक्रमण दर बर्हटी गैल बटैलै । कर्मचारीमे कोरोना भाइरसके संक्रमण डेखे लागलपाछे कैलाली जिल्लाके कतिपय कार्यालयके काम समेत प्रभावित हुइटी रहल बा ।
