कारागारमे कोरोना पुष्टि पाछे कैदीबन्दी त्रसित
पहुरा समाचारदाता
धनगढी, २ कार्तिक । कैलाली कारागारके २ जाने कैदीनमे कोरोना भाइरसके संक्रमण पुष्टि हुइल बा ।
सेती प्रादेशिक अस्पताल प्रयोगशालामे शनिच्चरके करल परीक्षणमे २ जाने कैदीनमे संक्रमण पुष्टि हुइल कैलाली कारागार जनैले बा । जेलेर महेन्द्रसिंह खड्का कर्तव्य ज्यान मुद्दाके ४० वर्षीय पुरुष कैदी ओ जबरजस्तीकरणी मुद्दाके अन्दाजी ६२ वर्षीय पुरुषमे संक्रमण पुष्टि हुइल जानकारी डेलै ।
ओहकान अनुसार ६२ वर्षीय कैदी प्यारालायसिसके विरामी हुइट । ओहकान सेती प्रादेशिक अस्पतालमे उपचार हुइटी रहल बा कलेसे ४० वर्षीय कैदीमे सामान्य लक्षण डेखलपाछे परीक्षण कराइबर संक्रमण पुष्टि हुइल हो ।
उहाँहे कारागारमे छुट्टे राखल बा । उ कैदी आउट डोर अथवा चौकीदारके रुपमे फेन काम करटी आइल रहिट । कैलाली कारागारमे २ कैदीनमे कोरोना संक्रमण डेखलपाछे अन्य कैदीबन्दी त्रसित हुइल बाटै ।
