बर्कामुरा स्थित सुर्मीनालामे मोटरेबल पुलके शिलान्यास

पहुरा समाचारदाता
हसुलिया, २ कार्तिक । कैलारी गाउँपालिका वडा नं. ३ बर्कामुरा स्थित सुर्मीनालामे बनेलागल मोटरेबल पुलके शिलान्यास करगिल बा ।

अँट्वारके रोज सुदूरपश्चिम प्रदेशके प्रदेश सभा सदस्य बीरमान चौधरी उ पुलके शिलान्यास करल रहिट । सुदूरपश्चिम प्रदेशके भौतिक पूर्वाधार विकास मन्त्रालय अन्र्तगतके ४ करोड ९६ लाख ९१ हजार ४९३ रुप्या लागतमे उ पुल निर्माण हुइ लागल हो ।

२०७७ सावन महिनामे ठेक्का सम्झौता हुइल पुलके २०७८ पुस मसान्तभित्रे निर्माण सम्पन्न कैना मेरके थेगिम कन्स्ट्रक्सन कम्पनी प्रालिसे ठेक्का सम्झौता हुइल बा ।

पुल शिलान्यास कार्यक्रममे कैलारी गाउँपालिकाके अध्यक्ष लाजुराम चौधरी, वडा नं. ३ के वडा अध्यक्ष कैलाश चौधरी, राजनीतिक दलके प्रतिनीधी, समाजसेवी, वुद्धिजिवी, भल्मन्सा लगायतहुक्रनके उपस्थिति रहल रहे ।