किसान बहुउद्देश्यीय मजाइल रजत जयन्ती

पहुरा समाचारदाता
धनगढी,१७ कार्तिक । अत्तरियामे रहल किसान बहुउद्देश्यीय सहकारी संस्था लिमिटेड सोम्मारके २५ औं बार्षिकोत्सव तथा रजत जयन्ती मनैले बा ।

रजत जयन्ती समारोहके उदघाटन रिलायन्स लाईफ ईन्स्योरेन्सके अत्तरिया शाखा प्रबन्धक धर्मसिह कुँवर रहिट । उ अवसरमे बोल्टी उहाँ विपन्न परिवारके आय–आर्जन बृद्धिके लाग सहकारीसे उत्कृष्ट कार्य करल कहटी प्रसंसा करलै ।

‘दुर दराजके विपन्न, पाछे परल समूदायहे समेटके सहकारी गाउँ–गाउँमे जाके बचत तथा ऋण लगानी करटी बा’, उहाँ कहलै ‘सहकारीके यी नमूना कार्य हो, यैसिक निम्न आयस्तर रहल मनैफे समेटल ओरसे मजा काम हो ।’ उहाँ सहकारीसे सेयर सदस्य ओ वचतकर्ताके भावना अन्सार आघे बह्रे पर्ना बटैलै । रिलायन्स लाईफ ईन्स्योरेन्सके अत्तरिया शाखा प्रबन्धक धर्म सिह कुँवर कार्यक्रमके वडका पहुना रहिट ।

शाखाके प्रवन्धक दुर्गा उपाध्याय सहकारीसे बैंकिङ ओ लघुबित्त कार्यक्रमसंगे कृषि प्रवद्र्धनत्मक कार्यक्रमफे संचालन करटी रहल बटैलै । उहाँ कहलै, सहकारी अइना दिनमे बित्तीय कार्यक्रम केल नइहुके सुत्केरी सेवाके कार्यक्रम, कृषि लगायतके कार्यक्रम संचालन कैना योजना बा ।’ उहाँ सेवाग्राहीके विमाके कार्यक्रम, रेमिटेन्स सेवा, मोबाईल बैंकिङ सेवा संचालन रहल बटैलै ।

‘सहकारीके क्षेत्रमे पहिल चो किसान बहुउद्देश्यी सहकारीसे ३ प्रतिशत क्यास ब्याक अफर सहित मोबाईल बैंकिङ सेवा संचालन करटी बाटी’, उहाँ कहलै ‘मोबाईल बैंकिङ एपसे रिचार्ज सेवा, बिजुली बिल भुक्तानी, टमान टिकट खरिद लगायतके काम करे सेक्जाई ।’

२०५२ सालमे लम्कीमे स्थापना रहल सहकारीके हाल २१ शाखा कार्यालय रहल बाटै । सहकारीके जिल्ला भरके ५५ हजार ४ सय ७ जाने सेयर सदस्य रहल बाटै । कलेसे अत्तरिया शाखामे ४ हजार सेयर सदस्य बाटै ।