थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत २२ अगहन २६४६, बिफे ]
[ वि.सं २२ मंसिर २०७९, बिहीबार ]
[ 08 Dec 2022, Thursday ]

घोडाघोडी ओ टीकापुरके नगर प्रमुखहे कोरोना संक्रमण

पहुरा | १७ कार्तिक २०७७, सोमबार
घोडाघोडी ओ टीकापुरके नगर प्रमुखहे कोरोना संक्रमण

पहुरा समाचारदाता
धनगढी,१७ कार्तिक ।
कैलाली जिल्लाके घोडाघोडी नगरपालिका ओ टीकापुर नगरपालिकाके नगरप्रमुख लगायत कर्मचारीहुकनहे कोरोना भाइरस संक्रमण पुष्टि हुइलपाछे अति आवश्यक बाहेक सक्कु सेवा बन्द करल बा ।

यिहे कार्तिक १४ गते नगर प्रमुख लगायत कर्मचारीहुकनके स्वाब संकलनमे हुइलमे सोम्मारके आइल रिपोर्टसे नगरप्रमुख ममताप्रसाद चौधरी लगायत चार कर्मचारीहे कोरोना संक्रमण पुष्टि हुइल हो । नगर प्रमुख लगायत कर्मचारीमे कोरोना पोजेटिभ आइलपाछे जोखिम परिस्थितिहे मध्यनजर करटी कार्यालयसे प्रवाह हुइना अति आवश्यक सेवा बाहेकके सेवा बन्द करल निमित्त प्रमुख प्रशासकीय अधिकृत खगेन्द्रबहादुर सिंह बटैलै ।

नगरपालिकामे अति आवश्यक सेवाके लाग केल अइना ओ आइबेर स्वास्थ्य सुरक्षा अपनाके अइना आग्रह करल बा । ओस्टेक मंगरके रोज कन्ट्रयाक्ट ट्रेसिङमे परल और जानेकफे स्वाब संकलन कैना जनागिल बा ।

ओस्टेक टीकापुर नगरपालिकाके नगरप्रमुख तपेन्द्रबहादुर रावल ओ एक जाने कर्मचारीहे कोरोना पोजेटिभ डेखल बा ।

ओस्टेक कर्मचारी कोरोना संक्रमण डेखलपाछे टीकापुर नगरपालिका वडा नम्बर ७ के कार्यालयफे सोम्मारसे अति आवश्यक बाहेक सक्कु सेवा बन्द करले बा ।

वडा अध्यक्ष रामलाल डंगौरा थारु विज्ञप्ति मार्फत कर्मचारीमे कोरोना संक्रमण विल्गाइपाछे कार्तिक १७ से २१ गतेसमके लाग अतिआवश्यक सेवा बाहेक सक्कु सेवा बन्द हुइल जनैलेै । कर्मचारीमे कोरोना संक्रमण डेखलपाछे सेवाग्राहीके स्वास्थ्यहे मध्यनजर करके बन्द करल जनागिल बा ।

सेतीमे परिक्षणमे ७६ जनहनमे संक्रमण पुष्टि

सेती प्रादेशिक अस्पतालके कोभिड–१९ के प्रयोगमे करल परिक्षणमे ७६ जनहनमे कोरोना पोजिटिभ डेखल बा ।

अस्पातलके सूचना अधिकारी दिलिपकुमार श्रेष्ठके अन्सार पछिल्का २४ घण्टामे करल परिक्षणमे कैलालीके सबसे ढेर ६६, कञ्चनपुरके ४, अछामके २, बैतडी १, डडेल्धुरा १, डोटीके २ करके ७६ जनहनमे संक्रमण पुष्टि हुइल बा ।

ओस्टेक २४ घण्टामे देशभर ठप २९ सय ३३ जनहनमे कोरोनाभाइरस संक्रमण पुष्टि हुइल बा । महिला ११७६ ओ पुरुष १७५७ जाने करके २९ सय ३३ जनहनमे संक्रमण पुष्टि हुइल स्वास्थ्य तथा जनसंख्या मन्त्रालय जनैले बा ।

ओस्टेक पछिल्का २४ घण्टामे ३१ सय ५० जाने ठिक हुइल बाटै कलेसे २४ जाने ज्यान गुमैले बाटै । यी संगे देशभर कोरोनासे मृत्यु हुइलके संख्या ९८४ पुगल बा ।

हाल देशभर कुल संक्रमित १ लाख ७६ हजार ५०० ओ ठिक हुइल संख्या १ लाख ३७ हजार ९९२ जाने रहेबेर सक्रिय संक्रमित ३७ हजार ५२४ जाने रहल बाटै ।

जनाअवजको टिप्पणीहरू