थारु राष्ट्रिय दैनिक
भाषा, संस्कृति ओ समाचारमूलक पत्रिका
[ थारु सम्बत १३ अगहन २६४६, मंगर ]
[ वि.सं १३ मंसिर २०७९, मंगलवार ]
[ 29 Nov 2022, Tuesday ]

कम्पनीसे समर्थन मोलमे धान खरिद

पहुरा | १८ कार्तिक २०७७, मंगलवार
कम्पनीसे समर्थन मोलमे धान खरिद

पहुरा समाचारदाता
धनगढी, १८ कार्तिक ।
खाद्य व्यवस्था तथा व्यापार कम्पनी धनगढी नेपाल सरकारसे तोकल न्यूनतम् समर्थन मोलमे धान खरिद सुरु करले बा ।

कम्पनीसे टीकापुरमे अपने गोदाममे काँटा सञ्चालन कैके सोम्मारसे धान खरिद कार्य सुरु करल हो । प्रमुख जिल्ला अधिकारी संयोजक रहल स्थानीय प्राथमिक खरिद समितिके बैठकसे करल निर्णयवमोजिम किसानके धान खरिद कार्य सुरु करल कार्यालयके प्रमुख अनिल श्रेष्ठ जानकारी डेलै । जिल्लाके मोहनपुर ओ टीकापुरमे रहल कम्पनीके अपने गोदाममे काँटा सञ्चालन कैके लावा धान खरिद सुरु करलमे सत्ती, भजनी ओ जोशीपुरमे एक/दुई दिनमे खरिद कार्य सुरु हुइ लागल श्रेष्ठ बटैलै ।

सरकारसे तोकल समर्थन मूल्यमे कम्पनीसे लावा धान खरिद करे लागल हो । सरकारसे मोटो धान प्रति क्वीन्टल दुई हजार ७३५ समर्थन मूल्य तोक्ले बा । कम्पनीसे यी बरस छ हजार ५०० मेक्टिक्टन (६५ हजार क्वीन्टल) धान खरिद कैना लक्ष्य राखल बा । गैल बरस ५० हजार क्वीन्टल धान खरिद करल रहे ।

कम्पनीसे धान खरिदके व्यवस्था समयमे नाइ कैके आजसम स्थानीय साना किसानहे घर खर्चके व्यवस्था करक लाग प्रति क्वीन्टल दुई हजार रुपैयाँमे व्यापारीहे बिक्री करे पर्ना वाध्यता रहल रहे । सरकारी कार्यालयसे समयमे धान खरिदके व्यवस्था नाइ कैके अपनहुक्रे डशैमे घर खर्च चलाइक लाग व्यापारीसे कहल भाउमे धान बेच्न वाध्य हुइल धनगढीके किसान रामदीन चौधरी गुनासो करलै ।

अनुकूल मौसमके कारण यी बरस जिल्लामे धान उत्पादन गैल बरससे वृद्धि हुइल अनुमान करल बा । कृषि ज्ञान केन्द्र कैलालीके प्रमुख खगेन्द्रप्रसाद शर्मा डुबानसे प्रभावित क्षेत्रबाहेक जिल्ला भरके उत्पादन यी बरस गैल बरससे कुछ वृद्धि हुइल अनुमान करल बटैलै ।

डुबानके समस्याके कारण भजनी ओ जानकीनगर लगायतके क्षेत्रमे करल जग्गाके धानवाली नष्ट हुइल रहे । जिल्लामे झण्डे ७० हजार हेक्टर जग्गामे वर्षे धान खेती हुइटी आइलमे उत्पादकत्व प्रति हेक्टर तीन दशमलव पाँच मे.टन रहल बा ।

जनाअवजको टिप्पणीहरू