टीकापुरमे केरा पकैना च्याम्बर सञ्चालन

पहुरा समाचारदाता
टीकापुर, १८ कार्तिक । टीकापुरमे आधुनिक प्रविधिसे केरा पकैना रेपरिङ च्याम्बर सञ्चालनमे आइल बा ।

केराके पकेट क्षेत्रके रुपमे परिचित टीकापुरमे कर्णाली कृषि सेवा प्रालि तापक्रम व्यवस्थापन प्रणालीसे केरा पकैना च्याम्बर सञ्चालनमे लानल हो । यिहीसे आघे यहाँ केरा पकाइक लाग विषादी प्रयोग हुइटी आइल रहे ।

टीकापुर नगरपालिका वडा नम्बर २ बन्दीपुरमे उ प्रालिसे निर्माण करल च्याम्बरसे केरा पकैना सुरु करल हो । च्याम्बरमे पकैना केरा लम्मा समयसम नाइ सर्ना, विषादीरहित स्वस्थकर रहना, हेरलेसे आकर्षक हडियार डेखजैना रहठ् ।

राष्ट्रिय गौरबके रानी, जमरा, कुलरिया सिचाईं आयोजनाके अनुदानमे प्रालि च्याम्बर सञ्चालनमे लानल हो । ३ करोड ५६ लाख रुपैयाँके लागतमे सञ्चालनमे लानल च्याम्बरके सञ्चालनके लाग आयोजनाके कृषि कार्यान्वयन इकाईसे १ करोड ९० लाख रुपैयाँ अनुदान डेहल रहे ।

प्रालिके प्रबन्ध निर्देशक वीरेन्द्र ढुंगानासे विश्व बैंकके सहयोगमे नेपाल सरकारमार्फत् आयोजनाके कृषि कार्यान्वयन इकाईके अनुदानमे च्याम्बर सञ्चालनमे लानल बटैलै । ढुंगानाके अनुसार ५ ठो च्याम्बरमे प्रतिपटक १ शय ५० टन केरा पकाइ सेकजैना बा । च्याम्बरमे राखल पाँच दिनमे केरा बजार पठाइ सेकजाइ ।

प्रालिके अध्यक्ष खड्कबहादुर शाह यी क्षेत्रके केरा कृषकहुक्रे समेत शेयर सदस्य रहना बटैलै । उहाँ कहलै ‘यकर तीन पक्षहे नै लाभ बा केरा कृषक बजारके समस्या भोगे नाइ परल, उपभोक्ता स्वस्थ्यकर विषादीरहित केरा पैना हुइल कलेसे कृषकहुक्रे नै शेयर सदस्य हुइना ओरसे नाफा फेन हुइना हुइल ।’

उपभोक्ताके स्वास्थ्यहे ध्यानमे राखके कृषकहे बजारके सहजीकरण कैना मद्दत पुग्ना उहाँ बटैलै । उहाँ प्रालिसे केराके अन्य परिकार समेत उत्पादन कैना लक्ष्य रहल बटैलै ।

टीकापुर क्षेत्रमे झण्डे ६ शय हेक्टर क्षेत्रफलमे व्यावसायिक केरा खेती हुइटी आइल बा । यहाँ उत्पादित केरा धनगढी, नेपालगञ्ज, पोखरा, काठमाडौं, बुटवलमे बिक्री हुइटी आइल बा ।