धनगढीके मटर व्यापारी पक्राउ
पहुरा समाचारदाता
धनगढी, १९ कार्तिक । धनगढी उपमहानगरपालिका–१०, जुगेडाके प्रहरी सहायक निरीक्षक ओ जवानके हत्यासे जोरल मटर (केराउ) के कारोवार करुइया एक जाने व्यापारीहे प्रहरी पक्राउ करले बा ।
जिल्ला प्रहरी कार्यालय कैलालीके प्रवक्ता प्रहरी नायव उपरीक्षक प्रतिक बिष्ट घट्नामे पक्राउ परलहुक्रनके बयानके आधारमे मटरको कारोवार करुइया धनगढी उपमहानगरपालिका–५ के ३५ वर्षिय राजिव गुप्ताहे पक्राउ करल बटैलै । धनगढी उपमहानगरपालिका–५, शिवनगरस्थित स्थित आदित्य ट्रेडिङसे गुप्ताहे मंगरके दिनके दुई बजे पक्राउ करल प्रहरी जनैले बा ।
अस्थायी प्रहरी पोष्ट जुगेडाके इन्चार्ज प्रहरी सहायक निरीक्षक गोविन्द बिक ओ प्रहरी जवान रामबहादुर साउँद हत्याकाण्डके अनुसन्धानके क्रममे धनगढीके व्यापारी गुप्ताके संलग्नता डेखलपाछे पक्राउ करल प्रहरी जनैले बा ।
पक्राउ परल गुप्ताहे जिल्ला प्रहरी कार्यालयके हिरासतमे राखके अनुसन्धान हुइटी रहल जनाइल बा । यिहे कार्तिक १ गते रातके नियमित गस्तीमे खटल बेला अस्थायी प्रहरी पोष्ट जुगेडाके इन्चार्ज प्रहरी सहायक निरीक्षक बिक ओ जवान साउदके विभत्स हत्या हुइल रहे ।
डुनु जनहनके शव हत्या करल अवस्थामे मोहना लडियामे फेला परल रहे । प्रहरीके अनुसन्धानसे मटर तस्करी करुइया समूहसे डुनहुनके हत्या करल खुलल् बा । हत्यामे संलग्न रहल ८ जनहनहे प्रहरी पक्राउ करसेकल बा ।
हत्यामे संलग्न रहल आरोपमे प्रहरी धनगढी उपमहानगरपालिका वडा नम्बर १० के ३१ वर्षिय पर्कु कना रोहित राना (क), रोहित राना (ख), उहे स्थानके २० वर्षिय राजेन्द्र राना, ३० वर्षिय चोर कना सुरेश राना, २५ वर्षिय गब्बर कना राजकुमार राना, २२ वर्षिय रामनिवास राना, २९ वर्षिय टल्लु कना दलराम राना ओ २५ वर्षिय गोपाल कना रामगोपाल रानाहे पक्राउ कैके अनुसन्धान हुइटी रहल जनाइल बा ।
आभिन १ जाने फरार रहल ओ ओहकान खोजी कार्यजारी रहल जिल्ला प्रहरी कार्यालय कैलाली जनैले बा ।
