थरुहट थारुवान मोर्चासे आन्दोलनके घोषणा (प्रेस विज्ञप्तिसहित)
पहुरा समाचारदाता
धनगढी, २० कार्तिक । थरुहट थारुवान राष्ट्रिय मोर्चा बिफेक रोज टीकापुरमे पत्रकार सम्मेलन कैके आन्दोलनके टमान कार्यक्रम सार्वजनिक करले बा ।
पहिचानके आधारमे संघीय व्यवस्था लागुु हुइ पर्ना कहटी लम्मा समयसे संघर्षरत मोर्चासे उठान करल १४ बुँदे माग मुद्दा प्रति सरकार गम्भिर नाइ हुइलेसे कडा आन्दोलन कैना चेतावनी सहित आन्दोलनके कार्यक्रमके सार्वजनिक करल हो ।
थरुहट थारुवान राष्ट्रिय मोर्चाका केन्द्रीय संयोजक लक्ष्मण थारु मोर्चासे उठाइल माग मुद्दा प्रति सरकार गम्भिर नाइ हुइलेसे अइना दिनमे कडा आन्दोलन कैना चेतावनी डेलै ।
मोर्चाके कैलाली संयोजक माधव चौधरीसे कैलालीके राजनितिक दलके जिल्ला कार्यालयमे थरुहट थारुवानसे उठान करल माग मुद्दा ओ टीकापुरके विषयमे पार्टीके स्पष्ट धारणाके माग सहित ज्ञापन पत्र बुझैना कार्यक्रम रहल बटैलै ।
ओस्टके टीकापुर राजबन्दीहुक्रनहे सहयोगके लाग अपिल कैना, अइना अगहन २० गते कैलालीमे आमसभा कैना ओ सभा सम्पन्न करक लाग पहिचान ओ अधिकारके लाग संघर्षरत सम्पूर्ण मोर्चा, संगठन ओ राजनीतिक दलसे समन्वय कैना ओ मोर्चासे उठान करल मागमुद्दा प्रति राज्य वेवास्ता करलेसे राज्य विरुद्ध कडासे कडा आन्दोलन कैना बटैलै ।
मोर्चासे संघीयता संस्थागत कैना संविधानके धारा २७४ लगायत पहिचान विरोधी धारा ओ अनुसुची ४ संशोधन करे पर्ना, थरुहट आन्दोलनके क्रममे टीकापुर घटना पश्चात टमान मुद्धा लगाइल थरुहट राजबन्दी सांसद रेशमलाल चौधरीसहितके मुद्धा खारेज करे पर्ना लगायत माग उठान करटी आइल बा ।
