सेनेटरी प्याड ओ डाइपर बनैना तालिम

पहुरा समाचारदाता
हसुलिया, २० कार्तिक । महिलाहे स्वरोजगार ओ आत्मनिर्भर बनैना उद्देश्यसे कैलारीके महिलाहे ७ दिने सेनेटरी प्याड ओ डाइपर बनैना तालिम डेहे लागल बा ।

सेनेटरी प्याड ओ बेबी डाइपर उत्पादन कैना उद्योग गाउँघरमे उद्योग स्थापना कैके महिलाहे स्वरोजगार ओ आयआर्जन कैके आत्मनिर्भर बनैना उद्देश्यसे उ तालिम डेहे लागल हो । कैलारी गाउँपालिका महिला तथा बालबालिका शाखाके आयोजना तथा समीक्षा महिला विकास बहुउद्देश्यीय सहकारी संस्थाके सहकार्यमे हुइटी रहल तालिममे वडा नम्बर ७ अन्तर्गतके २० जाने महिला सहभागी रहल बाटै ।

आयआर्जनके लाग सीप तथा व्यावसायिकता विकास कार्यक्रम अन्तर्गतके उ तालिमके उद्घाटन गाउपालिकाके उपाध्यक्ष लक्ष्मी सत्गौँवा थारु करल रही । उपाध्यक्ष थारु तालिममे सहभागि महिला तालिम लेहलपाछे गाउँघरमे रोजगारी पैना आशा व्यक्त करली । उहाँ गाउँपालिकासे टमान मेरके सीप मूलक तालिम डेके गाउँघरमे रहल वेरोजगार युवा लगायत, लक्षित वर्ग समुदायके महिलाहुक्रनहे रोजगार बनैना लक्ष्य लेहल बटैली ।

सहकारीके अध्यक्ष उर्मिला चौधरी तालिम पश्चात सहकारी मार्फत अपने सेनेटरी प्याड ओ डाइपर उत्पादन कैना उद्योग स्थापना कैना बटैली ।

उद्घाटन कार्यक्रममे वडा नम्बर ७ के वडाध्यक्ष कमलप्रसाद चौधरी, महिला बालबालिका शाखा प्रमुख बालकुमारी चौधरी लगायतके समेत उपस्थिति रहल रहे ।